Pandemia Covid-19, që shpërtheu në mars, e goditi fort Kosovën në të gjithë sektorët.

E nga frika se nuk do të mund t`i vinte “rreth” të gjitha shpenzimeve për ballafaqimin e saj, kryeministri i atëhershëm, Albin Kurti, kërkoi ndihmën financiare të mërgimtarëve.

Ajo nuk mungoi, meqë në fondin e krijuar enkas për ta, mërgimtarët dërguan gjithsej 667 mijë euro nga 716 mijë sa u grumbulluan në total. Për pjesën tjetër u përkujdesën kosovarët e këtushëm.

“Ka qenë i themeluar një fond, fondi COVID-19 për diasporën. Aty janë mbledhur rreth 667 mijë euro nga diaspora, derisa 49 mijë euro kanë hyrë nga donatoret e brendshëm. Gjithsej 716 mijë euro është totali i këtij fondi, i mbledhur edhe nga donatorët e jashtëm edhe ata të brendshëm”, u shpreh për Front Online, zëvendësministri i Financave, Kushtrim Brahimaj.

Këto të holla nuk janë shpenzuar akoma.

Megjithatë, zëvendësministri i Financave, Kushtrim Brahimaj, thotë se ato dihet se për çka do të harxhohen.

” Janë mbledh për COVID-19, të gjitha do të shpenzohen për të njëjtën temë. Varësisht nga kërkesat kryesisht nga Ministria e Shëndetësisë dhe dikasteret e tjera, të cilat bazuar në nevojat e tyre, secili shpenzim do të ndodhë”, u shpreh ai për Front Online.

Qeveria e Ministria e Financave janë treguar të shpejta dhe nuk kanë pritur për ekzekutimin e 60 milionë eurove për bizneset e prekura nga pandemia.

“Janë alokuar pothuajse të gjitha mjetet për të gjitha bizneset. Ata që nuk i kanë marrë është për shkak të mungesës së gjenerimit të dhënave nga ATK-ja. Në momentin që rregullohet, mjetetjanë aty dhe po presin të ekzekutohen për bizneset”,theksoi Brahimaj për Front Online.

Këto mjete, sipas Brahimajt, janë një infuzion për ekonominë e Kosovës.