Nënkryetari i LDK-së, Lutfi Haziri ka thënë se të gjitha zhvillimet me procesin e dialogut lidhen me sagën e targave mes Kosovës dhe Serbisë.
Këtë përgjigje, ai e dha në emisionin Context të ATV-së kur u pyet nga gazetari Lavdim Hamidi se si erdhi puna që të mos flitet më për njohje reciproke mes të dyja vendeve.
“Letra e Bidenit, ku përmendej njohja, i ka 2 vjet prej kur u publikua. Kurse ajo e Blinkenit 1 vjet. Krejt zhvillimet lidhen me tabelat e regjistrimit. Kanë filluar me bojkotin. Në Veri të Mitrovicës institucionet janë braktis. Mbahen me ushtrues detyre, me patrulla të policisë, me mandate të deleguara. Vakumi ekziston. Me vetë faktin që jemi detyruar me fol për normalizim të brendshëm para se të shkojmë me një ujdi, Vuqiq e ka shty kushtin e tij për statutin e Asociacionit”, u shpreh Haziri.
Haziri tha se shefi i ekzekutivit është ngulfat me procesin e dialogut.
“Kryeministri Kurti e vendoste dialogun prioritet të shtatë, tash e ka bërë të katërt, e është ngulfat me procesin. Asnjë qeveri pas 2013 s`ka mund t`i përballojë dialogut edhe është dashtë me shkaktu zgjedhje të jashtëzakonshme për shkak të mungesës së progresit në dialog”, tregoi Haziri.