Për të rinisur bisedimet ndërmjet Kosovës dhe Serbisë, pala kosovare dhe ajo serbe janë pajtuar që t’i heqin pengesat për dialog.

Kosova është pajtuar që të pezullojë përpjekjet për t’u anëtarësuar në organizatat ndërkombëtare, ndërsa Serbia u pajtua që të pezullojë përkohësisht fushatën e çnjohjeve të pavarësisë së Kosovës.

Në faqen e Ministrisë së Punëve të Jashtme figuron se deri më sot pavarësinë e Kosovës e kanë njohur 116 shtete.

Ndërkaq, sipas kryetares së Komisionit për Punë të Jashtme, Time Kadrijaj lista e shteteve që e kanë njohur Kosovën ka kaluar mbi 120.

“Ne jemi shtet i pavarur, Kosova është njohur nga më shumë se 120  vende të tjera. Kosova dhe Serbia duhet të jenë të barabarta gjatë bisedimeve në Bruksel. Nuk duhet të lejojmë që për agjenda të Serbisë të mos ketë liberalizim të vizave”, ka thënë Kadrijaj.

Shteti i Serbisë e udhëheqë fushatën e tërheqjes së njohjeve të pavarësisë së Kosovës që nga viti 2017. Këtë fushatë në emër të Serbisë  e ka drejtuar ministri i Punëve të Jashtme, Ivica Daçiq.

Ai pati deklaruar që 18 shtete i kanë tërhequr njohjet e Kosovës.

Shtetet që i kanë tërhequr njohjet e Kosovës, sipas të dhënave të Serbisë: Sao Tome dhe Principe, Surinami, Guinea Bisao, Burundi, Liberia, Papua Guineja e Re, Lesoto, Komonuelthi i Dominikës, Grenada, Unioni i Komoreve, Ishujt Solomon, Madagaskari, Palau, Togo, Republika Qendrore e Afrikës, Gana, Siera Leone dhe Nauru, shkruan Gazeta Sinjali.