Përgjigjja kaotike ndaj koronavirusit në Brazil, ku prej tij vdiqën më shumë se 105 mijë njerëz, ka shndërruar përvojën e vendit në një shkas shqetësimi që alarmoi shumëkënd përreth botës. Por teksa rastet në këtë vend shpërthyen, zhvilluesit e vaksinave e panë aty një mundësi unike.

Me përhapjen e vazhdueshme të rasteve me koronavirus, një numër përherë më i madh i ekspertëve të imunizimit, infrastruktura e fuqishme e prodhimeve mjekësore dhe me mijëra vullnetarët për testimin e vaksinës, Brazili është shfaqur si një akter potencialisht vital në orvatjen e botës për t’i dhënë fund pandemisë.

Tri prej studimeve më premtuese dhe më të avancuara për vaksinë në botë varen nga shkencëtarët dhe vullnetarët në Brazil, thuhet në raportin e Organizatës Botërore të Shëndetësisë për avancimin e kërkimeve të vaksinës.

Qeveria e plandosur shpreson se qytetarët e saj mund të jenë mes të parëve në botë që do të vaksinohen. Dhe ekspertët mjekësorë janë duke e imagjinuar mundësinë që Brazili të mund madje ta prodhojë dhe eksportojë vaksinën në vendet fqinje, një mundësi kjo që do t’i mbushte ata me gjënë që e kishin në mungesë gjatë gjithë këtij viti: krenari.

“Jam shumë optimist”, ka thënë Dimas Covas, drejtor i Institutit Butantan, një prodhues biofarmaceutik ndërkombëtarisht i njohur, që është në partneritet me “Sinovac”-un e Kinës për një testim që ka mbërritur në fazën e tretë të studimit, gjatë së cilës vaksinat potenciale testohen te më se 9.000 njerëz. “Brazili do të bëhet një prej vendeve të para që do ta kenë vaksinën”.

Gara për vaksinë

Rreth 5.000 brazilianë janë rekrutuar tanimë në mbështetje të një testimi për vaksinë, ndërmarrë prej “AstraZeneca”-s, kompani kjo farmaceutike britaniko-suedeze në partneritet me Universitetin e Oksfordit. Edhe 1.000 vullnetarë shtesë në Brazil janë rekrutuar për testimin e vaksinës së zhvilluar nga “Pfizer”-i, me seli në New York