Front TV

Kreu i Odës së Infermierëve: Mos i ndalni shtesat, 500 infermierë ikin çdo vit nga Kosova

Kreu i Odës së Infermierëve: Mos i ndalni shtesat, 500 infermierë ikin çdo vit nga Kosova
19:30 | 15 Korrik 2021

Gjatë gjithë pandemisë u morën me pacientët e prekur me COVID.

E edhe tash janë ata që po merren me imunizimin ndaj këtij virusi, duke kryer afro 300 mijë vaksinime.

Pavarësisht punës shtesë nuk dihet nëse infermierët do të gëzojnë ndonjë cent më shumë krahas pagës bazë.

Nga Ministria e Financave thonë se do të ndajnë 53 milionë euro për shëndetësinë në Pakon 420 milionëshe të Ringjalljes Ekonomike, por se për shtesat ose jo, është Ministria e Shëndetësisë ajo që vendos.

E një përgjigje për këtë nga kjo e fundit, mungoi, gjatë ditës, pavarësisht interesimit të “Front Online”.

Kryetari i Odës së Infermierëve, Naser Rrustemaj, shpreson se qeveria Kurti s`do ta bëjë gabimin e njëjtë si kur ua ndali shtesat, muaj më parë.

“Këtu nuk është vazhdu ndihma, është dashtë të vazhdohet sa i përket shtesat në pagë, pavarësisht punonjësit infektive dhe pulmologjia me disa infermierë që jepin shërbime me Covid 19 as në muajin e kaluar si tash, që është brengosëse. Nuk është në rregull”, theksoi Rrustemaj për “Front Online”.

Pakënaqësitë si këto e të tjera, ai vlerëson se janë bërë shkak që çdo vit Kosovës t`i ikin mbi 500 infermierë.

“Çdo vit ikin nga 500 apo 600 infermierë. Kjo nuk ka filluar tash, ka që 4 apo 5 vjet që ndodh kështu”, u shpreh ai.

Si odë thotë se nuk merren me organizimin e protestave, andaj fton sindikatat që përmes kësaj forme ta kundërshtojnë vendimin për ndaljen e shtesave.

“Ne si odë i mbrojmë të gjitha kërkesat. Janë sindikatat, ato duhet të organizojnë. Ne si odë nuk realizojmë protesta, greva, por i përkrahim të gjitha kërkesat që janë në interes të personelit shëndetësor”, u shpreh ai për “Front Online”.

Me greva e protesta, mbase jo.

Por, Qeverinë e pret përballja me një betejë ligjore, nëse u thotë jo shtesave për infermierët e për krejt personelin mjekësor.

Kryetar i Federatës Sindikale të Shëndetësisë, Blerim Syla, ka paralajmëruar padi ndaj saj.

1 abonim, 3 paisje, 240 kanale shqip – NimiTV në gjithë Evropën për vetëm 99.90€ për 12 muaj

Të tjera