Një bombol gazi që shpërtheu atje në një restorant la të lënduar burra, gra e fëmijë.
Nga 44 sa pësuan lëndime, 8 prej tyre trajtim po marrin në Klinikën e Kirurgjisë Plastike në QKUK.
“Në Klinikë për momentin janë të hospitalizuar tetë pacientë me djegie të rëndë të shkallës së dytë dhe të tretë. 6 prej tyre janë në Mjekimin Intensiv Qendror me një sipërfaqe mbi 35 % me djegie të shkallës së tretë dhe pjesërisht janë në gjendje mjaft, mjaft të rëndë”, shprehet Violeta Zatriqi, shefe e repartit të Kirurgjisë Plastike.
6 pacientëve të shtrirë në Mjekimin Intensiv nuk do t`u bie të qëndrojnë gjatë këtu.
Meqë në Kosovë, më tutje, nuk ka kushte për trajtimin e tyre, ata do të dërgohen urgjentisht për shërim jashtë vendit.
“Fatkeqësisht për shkak të mungesës së qendrës, jo për shkak të mungesës së kirurgëve, ne duhet t`i dërgojmë jashtë Kosovës, në Serbi, Kroaci, Turqi, zakonisht, Turqi ku kostoja e një pacienti që e dërgojmë atje është 100 mijë euro”, deklaroi ajo për Front Online.
Raste të tilla nuk janë të pakta brenda vitit.
E me kaq para sa derdhën në spitalet jashtë vendit, shefja e repartit të Kirurgjisë Plastike, Violeta Zatriqi, thotë se telashi i mungesës së një qendre tashmë do të ishte i zgjidhur.
“Që 20 vite, 5 deri në 6 pacientë shkojnë, deri në 100 mijë euro vetëm transport e të mos flasim për mjekimin që kushton 50, 100 dhe 200 mijë euro, do të ishin ndërtuar 10 Qendra për Djegie në Kosovë”, tregoi ajo për Front Online.
Andaj në mungesë të një objekti adekuat krejt çka thonë është lutja që të mos ketë raste të tjera të kësaj natyre.
“Mos dashtë Zoti të ndodh edhe ndonjë fatkeqësi, ku do t`i sistemojmë. Nuk e kemi sallën tonë operative. Për momentin i kemi 20 pacientë me djegie. Kemi mungesë të infrastrukturës”, u shpreh ajo për Front Online.
Autoritetet janë të njoftuara, sipas Zatriqit, me këto telashe, por që sipas saj nuk është se kanë ndërmarrë diçka ndonjëherë. /Front Online/
https://www.facebook.com/FrontOnlineMedia/videos/458026448527716