Shtatë kongresmenë amerikanë i dërguan një letër presidentit të vendit, Joseph Biden, me kërkesën që vendi të përfshihet më aktivisht në shtypjen e korrupsionit në Serbi, parandalimin e shtypjes së lirisë së mediave dhe organizimin e zgjedhjeve të lira dhe të ndershme.
Në letër, ndër të tjera, thuhet se presidenti i Serbisë, Aleksandar Vuçiq, ka thelluar korrupsionin, se qeveria i ka mundësuar TV Pink të bëjë fitime të mëdha dhe se punët e Telekomit shtetëror janë të mbuluara me fshehtësi.
Në letrën e kongresmenëve drejtuar njeriut të parë të shtetit më të fuqishëm në botë, thuhet se janë thellësisht të shqetësuar për situatën politike dhe humanitare në Serbi.
Kongresmenët kujtojnë se gjatë vizitës së tij në Serbi në gusht të vitit 2016, si zëvendëspresident i SHBA-së, Biden tha se prosperiteti i Serbisë është në interes të atij vendi.
“Prandaj, ne inkurajojmë administratën tuaj që të angazhohet me Presidentin Aleksandar Vuçiç në luftën kundër korrupsionit dhe për të shtypur sulmet ndaj mediave të lira. Të dyja çështjet janë vendimtare për Serbinë dhe për aspiratat e saj për t’u bërë pjesë e Bashkimit Evropian”, thuhet në letër.
Kongresmenët i bënë thirrje Bidenit të konsiderojë përdorimin e urdhrit ekzekutiv 14033, i cili përfshin “Bllokim të aseteve dhe ndalimin e hyrjes në Shtetet e Bashkuara të personave që ndikojnë në destabilizimin e situatës në Ballkanin Perëndimor”.
“Besojmë se do të ishte e dobishme, sepse do të inkurajonit një qeveri më transparente dhe më të përgjegjshme të Serbisë, e cila respekton demokracinë, të drejtat e njeriut dhe sundimin e ligjit”, theksojnë kongresmenët.
Politikanët amerikanë i kujtojnë Bidenit se liria e medias nuk është vetëm një vlerë kyçe amerikane, e sanksionuar në Kushtetutë, por se ajo është gjithashtu e rëndësishme për politikën e jashtme të SHBA-së, po aq sa për qeveritë autoritare kundërshtare në mbarë botën.
Ata i kujtuan Bidenit se në fund të vizitës së tij në Beograd, ai deklaroi se “kombet janë më të fortë kur dëgjohen zëra të ndryshëm./FrontOnline/
