Reshjet e shiut kanë shkaktuar vërshime në disa zona të Kosovës. Shtëpi banimi, lokale afariste e rrugë u dëmtuan nga këto vërshime.
E së fundmi Komuna e Malishevës ka intervenuar në rrugët e dëmtuara nga vërshimet.
“Ekipet e angazhuara për intervenim në rrugët e Komunës së Malishevës, ku ka pasur rrëshqitje të dheut dhe rërës, i kanë pastruar të gjitha rrugët dhe më nuk ka problem në qarkullim. Pas kësaj do të intervenohet në ura, ku ka pasur gërryerje të tokës, si pasojë e vërshimeve”, thuhet në komunikatën për media.
Drejtoria e Urbanizmit në Komunën e Malishevës njofton se është intervenuar në të gjitha rrugët të cilat janë mbuluar nga dheu apo rëra e bartur nga uji, edhe pse këto rrugë në asnjë ditë nuk kanë qenë të pakalueshme.
“Është intervenuar në mbylljen e gropave në qytet, që janë hapur gjatë vërshimeve, pastaj në Turjakë, në Lubizhdë, në 3 lagje të fshatit Vërmicë, në dy rrugë në Pagarushë, në Marali dhe në Carrallukë”, thuhet tutje në komunikatë.
Po ashtu, drejtoria ka bërë të ditur se tani do të merren me sanimin e urave, aty ku ka pasur gërryerje afër urave, me qëllim të sigurimit të urave dhe eliminimin e rrezikut të mundshëm.
Është duke vazhduar puna e komisionit për vlerësimin e dëmeve të shkaktuara nga vërshimet.