Komuna e Drenasit ka shpërblyer me kontratë mbi 100 mijë euro kompanitë që në dosje të tenderit kishin futur vërtetime tatimor me afat të skaduar. Kjo, por edhe shumë shkelje tjera ka gjetur Zyra Kombëtare e Auditimit (ZKA) gjatë auditimit të pasqyrave financiare për vitin 2020 për komunën e Drenasit, e cila drejtohet nga Ramiz Lladrovci, raporton “Front Online”.
Sipas auditorit në dosje të tenderit dhe te njoftimi për kontratë, te kushtet për pjesëmarrje respektivisht te kërkesat e përshtatshmërisë, ishte përcaktuar si kriter “Një vërtetim i nënshkruar nga Administrata Tatimore e vendit Tuaj të themelimit se Ju nuk jeni në vonesë për pagimin e tatimeve. Ky vërtetim duhet të jetë jo më i vjetër se 90 ditë kalendarike nga data e publikimit të njoftimit për kontratë, duhet të dorëzohet nga Operatori Ekonomik të cilit synohet dhënia e kontratës” , raporton “Front Online”.
Por, te aktiviteti i prokurimit përkatësisht te kontrata “Inventarizimi i shkollave – faza e dytë”, në vlerë 115,800€, ku fitues të këtij tenderi ishin kompanitë “Donito” SH.P.K si dhe si dhe N.T.P “Mali-I-Mitrovicë”, te njëri nga grupi i operatorëve ekonomik, ZKA-ja ka identifikuar se vërtetimi tatimor ishte prezantuar me validitet të skaduar përtej afatit 90 ditor nga data e publikimit të njoftimit për kontratë, dhe jo në përputhje me datën në sistemin elektronik të Administratës Tatimore të Kosovës, raporton “Front Online”.
Sipas auditorit kjo ka ndodhur si rezultat i kontrolleve të brendshme jo efikase në procesin vlerësimit të tenderëve dhe dhënies së kontratës konform kritereve të përcaktuara në dosje të tenderit dhe në njoftimin për kontratë, raporton “Front Online”.
“Mangësitë e identifikuara rreth mos plotësimit të kërkesave të përshtatshmërisë në dosje të tenderit dhe në njoftimin për kontratë, lidhur me vërtetimin tatimor mund të reflektojnë negativisht në përzgjedhjen e operatorit të përgjegjshëm ekonomik dhe në përmbushjen e drejtë të kontratës konform kushteve kontraktuese. Kryetari të sigurojë përmirësimin e kontrolleve të brendshme në procesin e vlerësimit dhe përzgjedhjes së tenderëve konform kritereve të përcaktuara në dosje të tenderit dhe në njoftimin për kontratë” thuhet në rekomandimin e auditorit, raporton “Front Online”.
