Qindra serbë nga Kosova, kryesisht nga Komuna e Gjilanit, Kamenicës, Ranillugut, Shtërpcës, që dy ditë po vaksinohen kundër COVID-19 në Bujanoc.
Transportimin e tyre po e bëjnë kompanitë nga Kosova.
Disa lexues të portalit “Front Online” i kanë dërguar dje dhe sot disa fotografi, ku shihen se kompania “Fehmi Company” nga Ferizaj, “Egnatia” nga Komuna e Gjilanit, “Dita”, po presin qytetarët serbë të Kosovës derisa vaksionoheshin në Shtëpinë e Shëndetit në Bujanoc.
Bëhet e ditur se vetëm mëngjesin e sotëm me autobusë nga Kosova janë dërguar në Bujanoc rreth 300 qytetarë serbë për t’u vaksinuar.
Madje mediet lokale serbe kanë raportuar se në mesin e atyre që prisnin për t’u vaksinuar kishte edhe qytetarë shqiptarë nga Komuna e Gjilanit.
Vaksinimi i qytetarëve të Kosovës, kryesisht serbëve, po realizohet pas paralajmërimeve të presidentit Aleksandar Vuçiq se do të organizohen punkte për imunizimin e bashkëkombasve të tij nga Kosova në brendi të Serbisë.
Përndryshe, Qeveria e Kosovës ende nuk ka filluar vaksinimin e qytetarëve të saj kundër COVID-19.
/Front Online/