Anëtari i kryesisë së Vetëvendosjes, Glauk Konjufca ka treaguar se me cilën parti mund të bëjnë koalicion parazgjedhor.
Sipas tij, i vetmi koalicion parazgjedhor i garantuar deri tash është me iniciativën politike të Vjosa Osmanit dhe me asnjë subjekt tjetër politik.
“LVV e ka shpjeguar me transparencë para opinionit jo vetëm tash, që i vetmi bashkëpunim i garantuar politik deri sot është me zonjën Vjosa Osmani dhe alternativën e saj politike që e ka prezantuar, rrugën që e ka zgjedhur të pavarur nga LDK-ja, deri tash dorën ia kemi zgjatur asaj dhe jo subjekteve tjera politike”, tha ai, shkruan FrontOnline.
Konjufca në KTV tha se ende nuk është konkretizuar diçka mes partisë së tij e Osmanit, por se ka një lloj reciprociteti mes tyre.
“Ajo e ka shprehë vullnetin e saj se do bashkëpunojë me LVV-në, ka një lloj reciprociteti mes VV-së dhe Vjosa Osmanit që të ketë bashkëpunim që nuk e përjashton kandidimin tonë në një listë të përbashkët. Nuk është vendosë. Osmani deri tash edhe të gjitha aktivitetet i ka bë në një lloj opsioni politik që ka marrë me vete deputetë e asambleistë”.
“Në aspektin elektoral nuk e kemi pasë asnjë takim konkret për ta formalizuar”, theksoi Konjufca./FrontOnline/