Hetuesve të Organizatës Botërore të Shëndetësisë u është ndaluar hyrja në Kinë pasi dolën pozitivë në testin për Covid-19.
Zyrtarët kinezë ua ndaluan atyre hipjen në aeroplan për t’u nisur drejt Wuhanit, ku ndodhet një ekip i agjencisë së Kombeve të Bashkuara për shëndetësi që do ta hetojë prejardhjen e koronavirusit, shkruan The Guardian.
Ky vendim u mor duke u bazuar në testet serologjike gjatë udhëtimit transit nëpër Singapor, raportoi fillimisht gazeta The Wall Street Journal, duke cituar njerëz të afërt me këtë çështje.
“Kërkesat përkatëse për kontrollin e parandalimit të epidemisë do të zbatohen në mënyrë të prerë”, tha zëdhënësi i Ministrisë së Jashtme të Kinës, Zhao Jijian, gjatë një konference për gazetarë, kur u pyet për këtë raport.
Ndryshe, rastet e para të koronavirusit në botë u regjistruan pikërisht në Kinë në dhjetor të vitit 2019. Brenda një kohe të shkurtër, virusi i ri u përhap në pjesën më të madhe të botës dhe tani në planet janë mbi 90 milionë persona të infektuar.
