Kryesia e Këshillit të Prindërve të Kosovës iu është drejtuar me një letër të përbashkët presidentes Vjosa Osmani, kryeministrit Albin Kurti, kryeparlamentarit Glauk Konjufca dhe kryesisë së SBAShK-ut, të cilëve iu është kërkuar që urgjentisht të gjendet një zgjidhje, në mënyrë që nxënësit të fillojnë mësimin.

“Ne si Kryesi e Këshillit të Prindërve të Kosovës, duke parë se gjendja me grevën në shkollat tona tanimë e ka humbur çdo arsye, ju drejtohemi me kërkesën që të lëvizni urgjentisht në mënyrë që nxënësit të kthehen në bankat shkollore!”, thuhet në letër.

“Ne si prindër, shumë herë jemi ndier të pafuqishëm dhe të zhgënjyer me gjendjen e krijuar. Deri më sot nuk i kemi drejtuar gishtin askujt për t’i kërkuar përgjegjësi për veprimet që po ndodhin në arsim. Sot, konsiderojmë se jemi sfiduar qenësisht dhe gjendja me të cilën po përballemi nuk ka më asnjë kuptim, sepse prindërit kanë filluar ta humbin durimin”.

Tutje në letër, Këshilli i Prindërve paralajmëroi se nëse deri më 1 tetor nuk arrihet një marrëveshje mes Qeverisë dhe SBAShK-ut, do të organizohet protestë.

“Nëse deri të shtunën, me datë 1 tetor nuk gjendet zgjidhja, atëherë prindërit do të jenë të detyruar që të shprehin indinjatën e tyre përmes protestës!”, deklarohet në letër.

“Ju ftojmë edhe një herë që të adresoni kërkesën tonë me prioritet të lartë!”, përfundoi Kryesia e Këshillit të Prindërve të Kosovës./Front Online