Autoritetet gjyqësore në Ekuador informuan zyrtarisht Julian Assange për pavlefshmërinë e kërkesës së tij për natyralizim, pra procesin e dhënies së shtetësisë, në një përgjigje me shkrim ndaj kërkesës së Ministrisë së Punëve të Jashtme të Ekuadorit.
Natyralizimi rishikohet kur jepet në bazë të fshehjes së fakteve përkatëse, dokumenteve të falsifikuara ose mashtrimeve, raporton “Guardian”, transmeton FrontOnline.
Autoritetet Ekuadoriane njoftuan se dokumentet mbi natyralizimin e Assange përmbajnë disa mospërputhje, nënshkrime të ndryshme, ndryshime të mundshme të dokumenteve dhe tarifa të papaguara.
Avokati i Assange Carlos Poveda tha se ky vendim u mor për shkak të procesit dhe se Assange nuk u lejua të paraqitej në këtë çështje. Ai njoftoi një apel në të cilin do të kërkojë sqarim të vendimit të autoriteteve ekuadoriane.
“Më e rëndësishme se çështja e shtetësisë është çështja e respektimit të të drejtave të njeriut dhe çfarë do të pasojë për shkak të procesit të tërheqjes së shtetësisë”, tha ai.
Assange mori nënshtetësinë Ekuadoriane në janar 2018 si pjesë e një përpjekjeje të dështuar nga qeveria e presidentit të atëhershëm Lenin Moreno për t’i dhënë statusin diplomatik dhe për ta hequr atë nga ambasada Ekuadoriane në Londër, ku kaloi shtatë vjet.
Gjykata kompetente e anuloi atë vendim të hënën./FrontOnline/