Kryetari i Sindikatës së Bashkuar të Arsimit Shkencës dhe Kulturës, Rrahman Jasharaj u ka bërë thirrje të gjithë deputetëve të Kuvendit të Kosovës, që të angazhohen që të ketë dialog e marrëveshje të Qeverisë me Sindikatat.
Përmes një letre, dërguar të gjithë deputetëve Jasharaj, ka thënë se të gjitha sindikatat me muaj të tërë janë angazhuar që të kenë dialog me Qeverinë por kjo nuk ka ndodhur,
E, si pasojë e kësaj është krijuar një situatë e tensionuar dhe SBAShK-u e sindikatat tjera kanë nisur me veprime të kufizuara e të përshkallëzuara sindikale, por duke i dhënë kohë e hapësirë Qeverisë për dialog e marrëveshje.
Në letrën dërguar deputetëve thuhet së nëse edhe pas protestës së nesërme Qeveria hesht atëherë arsimi dhe sektorët tjerë po shkojnë drejt grevës së përgjithshme.
Letra e plotë dërguar deputetëve:
Apel deputeteve dhe deputetëve të Parlamentit të Kosovës
Deputete e deputetë angazhohuni që të ketë dialog e marrëveshje të Qeverisë me sindikatat
Të nderuara deputete, të nderuar deputetet të parlamentit të Republikës së Kosovës SBASHK-u dhe sindikatat tjera duke respektuar zërin e anëtarësisë së tyre me muaj të tërë janë angazhuar , edhe përmes BSPK-së, që të kenë dialog me Qeverinë e për të arritur marrëveshje të pranuar për kërkesat legjitime të të punësuarve në arsim dhe në sektorët tjerë.
Mungesa e gatishmërisë së Qeverisë për dialog ka bërë që të krijohet situatë e tensionuar dhe SBASHK e sindikatat tjera kanë nisur me veprime të kufizuara e të përshkallëzuara sindikale, por duke i dhënë kohë e hapësirë Qeverisë për dialog e marrëveshje.
Ju kujtojmë se ndodhi protesta e 8 prillit me pjesëmarrjen vetëm të udhëheqësve sindikal , por Qeveria heshti, ndodhi edhe greva njëorëshe më 12 maj në tërë sektorin e arsimit që nga çerdhet e deri në universitete dhe prapë Qeveria heshti. Të premten , më 20 maj, do të jetë protestë me pjesëmarrje të të punësuarve në arsimim dhe tërë sektorin publik dhe nëse edhe pas kësaj Qeveria hesht dhe nuk angazhohet për dialog e marrëveshje me sindikatat, atëherë arsimi dhe sektorët tjerë po shkojnë drejt grevës së përgjithshme , të cilën ne nuk e dëshirojmë dhe prandaj po ju drejtohemi Juve të nderuara deputete dhe juve deputetë të nderuar që të angazhoheni dhe në një debat konstruktiv të ndihmoni që të ketë dialog e marrëveshje të Qeverisë me sindikatat ./FrontOnline