Igumeni i Manastirit të Deçanit, Sava Janjiq tha se pezullimi i punimeve në rrugën Deçan-Plavë përmes Zonës Speciale të Mbrojtur të Manastirit ishte një gjest inkurajues nga Qeveria e Kosovës dhe autoritetet në Deçan.

“Një gjest inkurajues nga qeveria dhe komuna, që tregon se ka mundësi që ndërtimi i kësaj rruge të bëhet me një rruge (alternative) rreth zonës së manastirit, në përputhje me vendimin e mëparshëm të Qeverisë së Kosovës nga viti 2014”, ka shkruar ai në Twitter, transmeton Klan Kosova.

Kryeministri Avdullah Hoti dhe kryetari i Deçanit, Bashkim Ramosaj të mërkurën u dakorduan për pezullim të punimeve në këtë rrugë.

I pari i Deçanit paralajmëroi se do të presë deri më 27 gusht, kur t’i takojë ambasadorët e akredituar në Prishtinë, por theksoi se nuk ka ndërmend të heq dorë nga projekti i kontestuar.