Danimarka ka nënshkruar në prill të këtij viti një marrëveshje me Kosovën, me të cilën bien dakord që shteti skandinav t’i sjell rreth 300 të burgosur në qelitë e Kosovës.
Ani pse janë bërë disa muaj, të burgosurit danezë nuk janë sjellë ende.
E kjo nuk do të ndodhë deri në fillim të muajve të vitit 2023.
“Ju informojmë se në bazë të planifikimeve fillestare, grupi i parë i të dënuarve mund të transferohen në muajt e parë të vitit 2023. Kjo sigurisht do të mund të ndikohet edhe nga procesi dhe koha që mund të marrë ratifikimi i Traktatit nga Parlamentet e të dyja vendeve”, thuhet në një përgjigje për Front Online nga Ministria e Drejtësisë.
Transferi i tyre do të bëhet me aeroplan dhe procesi do të realizohet e mbikëqyret nga shteti danezë.
“Të dënuarit do të transferohen përmes rrugëve ajrore nga Danimarka në Kosovë. Çështjet e aranzhimit të transportit të të dënuarve nga Danimarka në Aeroportin e Prishtinës janë nën përgjegjësinë e palës daneze”, thonë nga Ministria e Drejtësisë në përgjigjen për Front Online.
Të dënuarit që do të vijnë nga shteti skandinav do të jenë nën përkujdesjen e stafit korrektues vendor dhe nga vet ky shtet.
“Të dënuarit do të jenë nën përkujdesjen e stafit korrektues vendor i cili do të ketë bashkëpunim të ngushtë me menaxhmentin e institucionit korrektues (Burgut të Gjilanit) i cili do të jetë nga Danimarka”, deklaruan nga Ministria e Drejtësisë.
Se sa janë të gatshëm stafi vendor, nga MD thonë se janë duke i përgatitur që të arrijnë kapacitetin e mjaftueshëm.
Dhe vetëm atëherë do të fillojë zbatimi i Marrëveshjes.
“Shërbimi Korrektues i Kosovës është duke planifikuar arritjen e kapaciteteve të stafit vendor për të menaxhuar ekzekutimin e dënimeve të të dënuarve dhe vetëm pas përgatitjeve të duhura – arritjes së kapaciteteve të plota, do të fillojë zbatimi i Marrëveshjes”, thonë për Front Online nga MD.
Në këmbim të 210 milionë eurove, Kosova pranoi që t’i lëshojë qeli burgu me qira Danimarkës, për dhjetë vitet e ardhshme.
Kërkesa e Danimarkës ishte edhe për shtetet e tjera, por Kosova ishte e para që iu përgjigj./Front Online/