Ish ministri i Shëndetësisë, Uran Ismaili ka ofruar mbështetjen e tij për institucionet pas rritjeve të rasteve me Covid-19.

Përmes një postimi në llogarinë e tij në Facebook ai ka theksuar se varianti Delta është shqetësuese, duke bërë thirrje që të gjithë qytetarët të vaksinohen.

Postimi i plotë:

Rritja e rasteve me COVID-19, tashmë edhe me variantin Delta, është shqetësuese. Ky problem nuk duhet të anashkalohet, e as të kalohet në heshtje. Në fakt, duhet që të gjithë së bashku, pa dallim, të bëjmë thirrje e të ftojmë të gjithë qytetarët që të vaksinohen.

Si ish-Ministër i Shëndetësisë, jam i vetëdijshëm për sfidat që do të na presin në sistemin shëndetësor në rast të rritjes së numrit të të infektuarve, gjë që është e pashmangshme nëse nuk kemi vaksinimi masiv.

Ofroj gjithë mbështetjen time në këtë proces, dhe ftoj të gjithë ata që mund të kontribuojnë, që së bashku të angazhohemi për ta parandaluar sëmundjen që ka marrë shumë njerëz të dashur prej nesh.

Sot, një muaj para fillimit të vitit shkollor, nuk duhet të lejojmë që dikush të na ndalë e të na ndryshojë mendjen për vaksinim. Nuk duhet të lejojmë të mbyllemi prapë. Vaksinimi masiv është përgjigja e vetme. Shkenca dhe institucionet janë ato që duhet dëgjuar.

Prandaj, ju bëj thirrje që të vaksinohemi të gjithë. Të mos rrezikojmë jetët tona. Të mos lejojmë të na kolapsojë prapë sistemi shëndetësor. Pandemia është shqetësim i përbashkët dhe vetëm së bashku mund ta tejkalojmë./FRONTONLINE/

https://www.facebook.com/uismaili/posts/380561503423985