Front TV

Ish-ministri i Shëndetësisë: Nuk e arsyetoj largimin e Arben Vitisë

Ish-ministri i Shëndetësisë: Nuk e arsyetoj largimin e Arben Vitisë
19:24 | 07 Tetor 2021

Arben Vitia e la postin e ministrit të Shëndetësisë pak ditë më parë për t`i hyrë garës për kryetar të Prishtinës në zgjedhjet lokale të 17 tetorit.

 

Vendimin e tij nuk po e arsyeton Ferid Agani, që dikur e mbante vetë këtë pozitë.

 

Ndërrimet politike, sipas asaj që ai tha në një intervistë për “Front Online”, ndikojnë në menaxhmentin shëndetësor.

 

“Kam qenë shumë kundër kur ishte larguar ministri në detyrë Arben Vitia në vlugun e pandemisë, vitin e kaluar. Ka qenë situatë paradoksale që s`prisja që do të ndodhte prapë. Nuk e arsyetoj këtë zhvillim”, vlerësoi Agani.

 

Agani beson se edhe vetë Vitia do të përgjigjej kështu.

 

“Me e pyet edhe Vitinë kishte me thanë se do të ishte kundër kësaj. Por, ai është pjesë e një organizate politike, e cila është në situatë të veçantë të zgjedhjeve lokale, e cila e ka matur si pjesë më të rëndësishme vaksinimin e popullatës që është bërë në kohën e Vitisë, ku këtu është bërë një punë e shkëlqyeshme”, theksoi ai.

 

Çka ndikoi në shpërthimin e pandemisë në gusht e shtator? Flet doktori Ferid Agani

 

Neuropsikiatri Ferid Agani ka treguar në një intervistë për “Front Online” se çka ndikoi në rritjen e rasteve me COVID-19 në muajin gusht e shtator në Kosovë.

 

Ai përmendi tre shkaktarë kryesorë, në mesin e të cilëve edhe vaksinimin e vonshëm.

 

“Mendoj se ka qenë një bashkëveprim i disa faktorëve, jo të volitshëm në një periudhe të shkurtë kohore. Filluam vonë me vaksinimin e popullatës, e dyta në verë, qershor e korrik, u mashtruam me numra tejet të ulët të rasteve. Në të njëjtën kohë e patëm vlugun e bashkatdhetarëve tonë të cilët nuk patën mundësi ta vizitojnë Kosovën viti e kaluar. Po ashtu edhe dasmat e shtyra për një vit i zunë ato të këtij viti. Patëm tubime të shumta familjare. Kur të gjitha këto kombinohen me variantin Delta, atëherë e kemi një përgjigje të qartë. Hapja e klubeve të natës po ashtu ka qenë e paarsyeshme”, u shpreh ai.

 

Ai tha se rritja e infektimeve do të mund të evitohej lehtësisht nëse Ministria e Shëndetësisë do të ndërmerrte këto masa.

 

“Në mënyrë të lehtë është kaluar ky fakt i ardhjes së mërgimtarëve. Është dashtë të verifikohen në pika kufitare ata nëse janë ose jo të vaksinuar. Dasamat të kontrollohen, të kufizohet pjesëmarrja e vetëm atyre individëve që kanë qenë të vaksinuar ose një test që janë negativ”, theksoi ai.

 

Sipas Aganit situata me pandeminë tash në tetor është stabilizuar.

Ish-ministri i Shëndetësisë: Ora policore e panevojshme dhe e paarsyeshme

Doktori Ferid Agani vlerëson se ora policore në vend duhet të hiqet.

 

Ai tha se mjafton që të mbikëqyren më mirë hapësirat e mbyllura, veçanërisht ato të gastronomisë.

 

“Ora policore mendoj se është përfundimisht e panevojshme, plotësisht e paarsyeshme”, theksoi ai.

 

Të kundërtën e thotë kur pyetet për maskën.

 

“Ndërsa sa i përket bartjes së maskave unë mendoj se është e nevojshme të vazhdohet përdorimi i tyre mbikëqyrja, monitorimi, por veçanërisht në kontekstin e hapësirave të mbyllura. Pra, jo aq shumë në kontekstin e hapësirave të hapura, por në kontekstin e hapësirave të mbyllura”, deklaroi ai.

 

Neuropsikiatri Agani: Pandemia ndikoi në shëndetin mendor, numri i pacientëve për trajtim po shtohet

Agani tha se pandemia ka ndikuar shumë në shëndetin mendor të qytetarëve.

“Ballafaqimi me këtë virus do të ketë pasoja afatgjata dhe po dokumentohet, çdo ditë e më tepër kemi pacientë të cilët kanë forma të ndryshme të çrregullimit mendor si pasojë e stresit kronik tanimë të ballafaqimit me situatën e pandemisë, rreziqe të ndryshme të cilat i tërheq me vete ballafaqimi me virusin e Covidit.

 

Ai foli edhe për simptomat.

 

“Shumicën e madhe të rasteve kemi të bëjmë me çrregullime të ankthit, kemi të bëjmë me çrregullime depresive, çrregullime fobike, obsesive, kombinime të ndryshme të këtyre faktorëve, çrregullime konvezive, deri te çrregullimet më serioze siç janë depresioni, e më të thella deri të çrregullimet psikike”, theksoi Agani.

Përfito FALAS një pushim për çift në Budva

Të tjera