Ish-ambasadori i SHBA-së në Kosovë, Greg Delavy, ka thënë se është shumë e rëndësishme që Sekretari i Përgjithshëm i NATO-s, Jens Stoltenberg, i ka kujtuar Beogradit dhe Prishtinës se NATO ka forca të konsiderueshme paqeruajtëse në Kosovë, transmeton Zëri i Amerikës.
Diplomati me përvojë, i cili shërbeu si ambasador në Prishtinë nga mesi i vitit 2015 deri në mesin e vitit 2018, tha në një intervistë për Zërin e Amerikës se është e rëndësishme që Sekretari i Përgjithshëm i Aleancës së Atlantikut të Veriut ia përcolli Presidentit të Serbisë Aleksandar Vuçiq dhe Kryeministrit të Kosovës, Albin Kurti, se është i gatshëm të dërgojë më shumë trupa për të mbështetur misionin e KFOR-it – nëse është e nevojshme.
A mund të kontribuojë rezultati i bisedimeve në de-përshkallëzimin e tensioneve, veçanërisht në veri të Kosovës?
Unë sigurisht shpresoj kështu. Shumë varet nga veprimet e Beogradit – i cili e ka vënë veten në një pozicion për të kontrolluar tensionet. Fatkeqësisht, duket se Beogradi përfiton nga brenda duke shkaktuar tensione në Kosovë.
Sipas mendimit tuaj, çfarë hapash duhet të ndërmarrin Beogradi dhe Prishtina dhe liderët e tyre për të ulur tensionet?
Serbia duhet të njohë pavarësinë e Kosovës nëse dëshiron të bëhet anëtare e vërtetë e familjes evropiane. Nëse Serbia do ta bënte këtë, unë jam i sigurt se Kosova do të përgjigjej në një farë mënyre dhe do të kontribuonte për paqen rajonale, si dhe zhvillimin ekonomik dhe politik.
Dialogu i ndërmjetësuar nga Bashkimi Evropian do të vazhdojë në Bruksel pas një pauze që zgjati më shumë se një vit. Bisedimeve u paraprinë me tensione lidhur me vendimet e qeverisë së Kosovës për targat dhe dokumentet hyrëse-dalëse të qytetarëve të Serbisë. Këto vendime duhet të hyjnë në fuqi më 1 shtator. A shihni një mënyrë për ta kapërcyer atë mosmarrëveshje dhe si?
Të dyja vendet duhet të zbatojnë marrëveshjen e targave të negociuar me ndihmën e BE-së.
Përmendet se liderët e Kosovës dhe Serbisë mund të shqyrtojnë edhe çështje të tjera si formimin e Bashkësisë së Komunave me shumicë serbe, apo zbatimin e marrëveshjes energjetike. Çfarë prisni në këtë kuptim?
Është e paqartë nëse këto tema do të diskutohen. Megjithatë, mendoj se është çmenduri që qytetarët nga veriu i Kosovës nuk i kanë paguar faturat e rrymës me vite. Kjo ka kontribuar në humbjen e energjisë elektrike, dëmtimin e mjedisit përmes minierave të Bitcoin – i cili konsumon një sasi të madhe të energjisë elektrike.
A mendoni se dialogu ndërmjet Kosovës dhe Serbisë ka nevojë për përfshirje më të madhe të Shteteve të Bashkuara?
Shtetet e Bashkuara janë të angazhuara në një sërë sfidash të rëndësishme të politikës së jashtme, si Ukraina dhe Rusia, Kina apo Irani. Pavarësisht, mendoj se ata janë ende të angazhuar në Kosovë dhe do të vazhdojnë ta bëjnë këtë. Bashkëpunimi i Shteteve të Bashkuara dhe Bashkimit Evropian për dialogun është i mirë dhe paraqet një avantazh të madh dhe mbështetje të madhe për zgjidhjet për t’i dhënë fund problemit të serbëve të Kosovës.
A ka ndonjë mënyrë që Kosova dhe Serbia të bien dakord për ndonjë gjë, duke pasur parasysh tensionet ekzistuese?
Nëse të dyja vendet zgjedhin paqen dhe integrimin me Evropën si prioritete – atëherë ka vend për një marrëveshje. Megjithatë, nëse prioritet i jepet politikës së brendshme në vend të zgjidhjeve, bëhet e vështirë arritja e një marrëveshjeje.
A do të përfundojë ndonjëherë procesi i negociatave duke pasur parasysh të gjitha pengesat?
Ka gjithmonë shpresë. Ruajtja e status quo-së nuk i ndihmon qytetarët e atyre vendeve. Pushtimi i pajustifikuar i Rusisë në Ukrainë pati efektin e rritjes së tensioneve në të gjithë Evropën. I takon liderëve të Kosovës dhe Serbisë që të fokusohen në sigurimin që këto tensione të mos përkeqësohen. Ne të gjithë duhet të punojmë për ta bërë botën një vend më pak të rrezikshëm. Banorët e Ballkanit Perëndimor, qytetarët e Kosovës dhe Serbisë meritojnë një të ardhme evropiane. Ata mund ta arrijnë atë nëse udhëheqësit e të dy vendeve vendosin synimin për paqen, zhvillimin politik dhe ekonomik./FrontOnline/