Aktakuzat e fundit nga Gjykata Speciale e kanë shkundur skenën politike të Kosovës. Presidenti Thaçi dha dorëheqje, pozitën e tij e mori kryekuvendarja Vjosa Osmani – ndërsa partia e Ramush Haradinajt kërkon që ta bëj Ramush Haradinajn president. Veç kësaj, kjo parti, ashtu si Vjosa Osmani – kanë kërkuar ndërprerjen e dialogut me Serbinë. Por, çka mendon Isa Mustafa për këtë gjë?

Kryetari i partisë më të madhe të koalicionit qeveritar në një prononcim për Periskopin e ka quajtur këtë qëndrim të Vjosa Osmanit dhe Ramush Haradinajt si “trokitje në derë të hapur”.

Më tej, ai e vlerësoi si të paarsyeshme një bllokim tjetër të këtij procesi – që kishte përjetuar bllokada edhe gjatë qeverisjes së Ramush Haradinajt dhe qeverisjes së Albin Kurtit.

Mustafa  tha se një gjë e tillë madje nuk ishte kërkuar as nga ata që po vuajnë proceset gjyqësore në Hagë, Hashim Thaçi dhe Kadri Veseli.

“Kërkesa për ndërprerje të dialogut nuk mund të arsyetohet. As z.Thaçi dhe as z.Veseli nuk kanë kërkuar ndërprerje të dialogut, sa kanë qenë në Kosovë, e as nga Haga; nuk i kanë përzier Dhomat e Veçanta me dialogun. As PDK-ja. E kam theksuar se dialogu nuk zhvillohet per Serbinë por zhvillohet për interesa të Kosovës, për njohje reciproke”, ka thënë z.Mustafa.

Kreu i partisë më të vjetër parlamentare në vend e ka ritheksuar rëndësinë e partneritetit të Kosovës me aleatët e saj – edhe në këtë çështje.

“[Dialogu] Është çështje e partneritetit me BE-në dhe SHBA-në. Është edhe një fakt. Sa kam njohuri, as ne nentor dhe as në dhjetor nuk është caktuar asnjë takim për dialogun. Tani pasojnë Kërshëndellat. Kështu që këta që po kërkojnë ndërprerje të dialogut, po flasin kot, po trokasin në derë të hapur”, ka vijuar më tej Mustafa.

I pyetur se a konsiderohet partneritet konstruktiv prej anës së AAK-së dhe Haradinajt kushtëzimi për t’u bërë president i vendit për t’i shmangur zgjedhje, ai ka pasur një përgjigjje të matur politike.

“Çdokush që i plotëson kriteret kushtetuese, ka të drejtë të pretendojë për president të vendit. Kemi nevojë për një frymëmarrje pas arrestimit të presidentit. Të mos ngarendim në atë zyre, e të tregojmë dinjitet. Një president do të zgjidhet, tani ose pas zgjedhjeve,” – ka thënë ai.