Kanë mbetur edhe gjashtë muaj nga përfundimi i mandatit të presidentit Hashim Thaçi, e partitë politike kanë filluar t’i bëjnë publike emrat e kandidatëve për president.
Nënkryetari i Lidhjes Demokratike të Kosovës, Lutfi Haziri, në një prononcim për Front Online, ka thënë se në këtë parti nuk është biseduar ende për çështjen e presidentit.

“Nuk kemi biseduar ende për këtë çështje, ende në LDK”, tha shkurt ai.

Ndërsa i pyetur se a do të jetë kryetari i kësaj partie Isa Mustafa, kandidat për president të vendit pas kalimit të mandatit të presidentit aktual, Hashim Thaçi, Haziri tha se në momentin që diskutohet kjo çështje në parti do ta bëjnë publike.

“Nuk kemi biseduar ende, kur të bisedojmë ju njoftojmë. Kur t’i kalon mandati, ne dalim me qëndrim politik, përderisa është në zyre nuk bisedojmë për çështjen presidentit”, u shpreh ai.

Nënkryetari i LDK-së: Qeveria është stabile, u dëshmua se i ka numrat për të funksionuar

Nënkryetari i LDK-së, Lutfi Haziri, foli edhe për përçarjet brenda koalicionit qeverisës, raporton Front Online.

Ai tha se me votimin e Ligjit për Rimëkëmbje u dëshmua që koalicioni i ka votat e mjaftueshme për të funksionuar.

“Koalicioni është duke punuar, u dëshmua që i ka votat e mjaftueshme për të funksionuar. Ligji për Rimëkëmbje Ekonomike e dëshmoi se 64 deputetë e mbështesin këtë Qeveri, vazhdojnë të punojnë, është në stabilitet”, tha nënkryetari i LDK-së./Front Online/