Pas arritjes së 4 mijë e 680 dozave të vaksinës Pfizer/Biontech kundër COVID-19, në qendrën e vaksinimit në sallën “1 Tetor”, ka vazhduar vaksinimi profesionistëve shëndetësorë nga e tërë Kosova.
E për të marrë këtë vaksinë është̈ parë një interesim i madh i profesionistëve shëndetësorë̈, më shumë se sa në fazën e parë.
Këtë e thotë edhe zëdhënësi Ministrisë së Shëndetësisë, Faik Hoti.
“Në fazën e parë kur është bërë analiza pse numri i punëtorëve shëndetësorë nuk ka qenë në nivelin që e kemi pritur për t’u vaksinuar, kanë qenë arsye të ndryshme, disa kanë dhënë si arsye faktin që kanë qenë të infektuar gjatë asaj kohe me Covid-19, një numër tjetër ka dhënë si arsyetim faktin që sapo kanë kaluar Covidin dhe kanë vlerësuar se kanë antitrupa, ndërsa mund të supozohet se një numër i tyre ka preferuar që të zgjedh vaksinën Pfizer që të vaksinohet kundër Covid 19”, ka thënë Hoti për Front Online.
Hoti i ka bërë thirrje qytetarëve që të vaksinohen kundër Covid-19 derisa tha se synojnë që vaksinimi të shtrihet në shumë kategori.
“I rekomandojmë popullatës që të vaksinohet me të, dhe të mos bëjë përzgjedhje, thjesht ta marrë atë vaksinë sa më parë, për shkak se shohim se trendi i vaksinimit në shtetet e tjera po vjen duke u rritur dhe ne synojmë që në javët në vijim ta shtrijmë vaksinimin sa më shumë në kategori të popullatës”, tha ai për Front Online.
Për Vjollca Jusufin, dhe Prishtina Blakaj, vaksina Pfizer është më e besueshme andaj edhe kanë vendosur që të vaksinohen me të.
“Kemi përzgjedh Pfizer me u vaksinu, arsyeja nuk kam pas besimin në AstraZeneca për shkak të moshës”, tha Jusufi.
“Po pres me u vaksinu, nesër se tash është pritje e madhe”, tha për Front Online Prishtina Blakaj.
Kurse, Hyrie Qosaj për Front Online këshilloi që të gjithë të vaksinohen.
“Vaksina është çdoherë e mirë me e marrë edhe sigurisht edhe më të ri, se na më të vjetër që jemi, vaksinat edhe përpara i kemi marrë kundër viruseve, edhe tash u dashtë, po ma mirë vonë se kurrë”, tha ajo.
E procesin e vaksinimit të stafit shëndetësorë, e ka parë nga afër edhe Komisioneri i lartë për Zgjerim dhe Fqinjësi, Oliver Varhelyi, i shoqëruar me kryeministrin, Albin Kurti, dhe Ministri i Shëndetësisë, Arben Vitia.
“Kjo është një ditë e mrekullueshme për vendet e Ballkanit Perëndimor dhe për Kosovën. Ky është kontributi më i rëndësishëm që kemi mundur ta bëjmë për të filluar ta shënojmë fundin e pandemisë sepse pandemia do të përfundojë kur të vaksinohemi të gjithë”, ka thënë ai.
Kurse Kurti, tha se nuk do të ndalet derisa të vaksinohen 60% të popullatës.
“Sot po e rifillojmë procesin e vaksinimit në mënyrë që mos të ndalemi deri sa të arrijmë objektivin tonë për vaksinimin e 60% të popullsisë”, ka thënë Kurti
Gjatë ditës së djeshme vendi ynë ka pranuar 4.680 vaksina prej 95.000 sa janë ndarë nga BE, në kuadër të mbështetjes së vaksinimit në vendet e Ballkanit Perëndimor.