Në Ministrinë e Punëve të Brendshme u mbajt takimi i Grupit Ndërinstitucional për Menaxhim të Incidenteve, ku u vendos që për të menaxhuar më mirë dhe më efektshëm pandeminë, të iniciohet hartimi i koncept-dokumentit të ligjit për COVID-19.

Ministri i Brendshëm, Agim Veliu, theksoi se situata me pandeminë ditëve të fundit është e rënduar. Për këtë qëllim, ai tha se Ministria e Shëndetësisë ka hartuar dhe shpërndarë Manualin, i cili do të ndihmojë se si të vijojë qeverisja dhe biznesi në kushte pandemie, në të dy sektorët, publik dhe privat.

“Ministria e Punëve të Brendshme ka hartuar udhëzues të bazuar në Manualin e Ministrisë së Shëndetësisë për secilin institucion të vetin dhe është e gatshme t’iu ofrojë mostrën dhe t’i mbështesë me ndihmën e eksperteve të gjithë Qeverinë e Kosovës si tërësi”, theksoi Veliu.

Ministri i MPB-së thekoi se udhëzuesi do të ndihmojë për vijimësinë e qeverisjes në kushte pandemie në institucionet përkatëse, por edhe institucioneve tjera që nuk janë të përfaqësuara në Grupin Ndërinstitucional, duke u kujdesur njëkohësisht që të mos ketë shkelje ligjore, “siç kishte ndodhur gjatë mandatit të Qeverisë së kaluar”.

Ndërkaq, ministri i Shëndetësisë, Armend Zemaj, vuri në dukje përkushtimin e tij dhe personelit shëndetësor për menaxhimin e situatës me COVID-19, pas lehtësimit gradual të masave, duke marrë për bazë sfidat e kohëve të fundit për shkak të rritjes së madhe të numrit të qytetarëve që janë infektuar.

Ai kërkoi nga të gjitha institucionet publike dhe private që të zbatojnë Manualin që e ka hartuar MSH-ja, i cili është obligativ për të gjithë qytetarët pa dallim.

Njëkohësisht, të gjithë anëtarët e grupit apeluan qytetarët e Kosovës të kenë kujdes dhe disiplinë maksimale, me qëllim që të bëhen të gjitha përpjekjet për të mos qenë të detyruar t’i rikthejmë masat kufizuese.