Rastet e reja të infektimit mE Covid-19 kanë filluar të rriten në Kosovë.
Vetëm gjatë 24 orëve të fundit janë shënuar 106 raste të reja, kurse rastet aktive kanë arritur mbi 1 mijë.
Ekspertët e fushës kanë paralajmëruar edhe një mundësi të një vale të re me COVID-19.
Infektologu Hamdi Ramadani në një prononcim për Front Online ka thënë se rritja e rasteve pozitive do të vazhdojë edhe në ditët në vijim.
E disa nga shkaktarët kryesorë sipas tij janë ardhja e mërgatës, grumbullimi nëpër ahengje të ndryshme.
“Në tri javët e fundit është shënuar një rritje e dukshme me COVID këto shifrat e fundit mund të shkojnë edhe në 200 e më shumë në ditët në vijim. Kjo rritje e rasteve është nga ardhja e madhe e mërgatës, ahengjet në restorante e faktori më i rëndësishëm është që ne si vend nuk kemi arritur që të imunizohemi kolektiv me masë me dozën e tretë, ri infektimi prej COVID-it nuk është krejt e pamundur, por është shumë e rrallë dhe mendoj që një dozë e vaksinës nuk e mbron qytetarin as për një javë e as për tre muaj edhe personat që e kanë kaluar COVID-in mund të infektohen serish”, potencoi Ramadani.
Sipas Ramadanit, nëse vazhdon trendi i rritjes së rasteve me Coronavirus, masat anti-covid duhet të rikthehen.
Ai thotë se maska dhe distanca nuk duhet të mungojnë në ambiente të mbyllura.
“Nuk mendoj që do vijmë me një situatë se çfarë ishte vitin e kaluar por rritje të rasteve do të presim ditët e muajve të radhës, por nëse situata shkon në rritjen e rasteve më të theksuar me një valë të re të pandemisë atëherë masat e përgjithshme duhet të kthehen menjëherë, me distancë, edhe në ambientet e mbyllura gjithsesi me maska”, u shpreh Ramadani.
I pyetur se a është Kosova e gatshme të fillojë me dozën e katërt të vaksinës anti-COVID, Ramadani theksoi se kjo vaksinë duhet të merret vetëm nga ata që kanë tri dozat.
“Vaksina e katërt duhet të jepet edhe te na për ata të cilët kanë marr tri dozat e tjera por ne nuk mund të fokusohemi në dozën e katërt pasi që ju thash që larg jemi me marrjen e vaksinës me dozën e dytë duhet të fokusohemi që të merret edhe doza e tretë”, tha ai për Front Online.
Ramadani u ka bërë apel të gjithë qytetarët që të vaksinohen me 3 dozat anti-COVID në mënyrë që mos të përshkallëzohet situata në vend.
Kujtojmë se Ministria e Shëndetësisë, ka njoftuar se numri total i dozave të administruara ka arritur në 1.830.700, shkruan Front Online.