Më 16 shtator ka filluar fushata elektorale për zgjedhjet lokale, raporton Front Online.
Partitë politike u pajtuan që fushatën ta zhvillojnë online, e vetëm 5 ditë të jenë në teren.
Por infektologu Hamdi Ramadani në një intervistë për Front Online ka thënë se partitë nuk i respektuan masat sipas rekomandimeve të IKSHP-së.
“Kjo fushatë që po manifestohet e për fat të keq nuk po respektohen edhe masat të cilat vinë si rekomandime të Institutit e Ministria e Shëndetësisë”, ka thënë ai për Front Online.
Ramadani: Tubimet e partive po e favorizojnë Coronavirusin
Ramadani tha se tubimet e partive politike do të ndikojnë në rritjen e rasteve ditëve në vijim dhe po e favorizojnë përhapjen e virusit.
“Të gjitha tubimet të gjitha masat të cilat nuk përfillen nuk respektohen e mundësojnë favorizimin e pandemisë Covid-19 por edhe të sëmundjeve akute respiratore që i kemi”, ka thënë Ramadani për Front Online.
Infektologu: Në uljen e rasteve ndikuan masat e Qeverisë
Infektologu Ramadani thotë se ulja e rasteve ditore dhe vdekjeve me Coronavirus ditëve të fundit në vend është pas masave të fundit të ndërmarra nga Qeveria.
“Prandaj mendoj që masat të cilat ishin javë më parë, kanë ndikuar në uljen e rasteve, pastaj vaksinimi, këta janë faktorët që kanë ndikuar që ta kemi një situatë më të mirë”, ka thënë Ramadani.
Ramadani: Këto janë kategoritë që duhet të vaksinohen me dozën e tretë
Infektologu Ramadani u ka bërë thirrje qytetarëve që të vaksinohen në mënyrë që t’i kthehemi normalitetit, pasi sipas tij, kjo është mënyra e vetme që të jemi të sigurt nga pandemia me Coronavirus.
“Kur kemi mbi 70% të imunizuar dhe kur e dimë që kemi një numër të imunizuar që e kanë kaluar sëmundjen atëherë situata është më e lehtë e kontrolluar dhe mund të jetë më e qëndrueshme gjendja, do të ketë më pak të hospitalizuar shumë pak të infektuar apo edhe zero të sëmurë rëndë të cilët mund të paraqesin vdekshmëri”, ka thënë a.
Infektologu kosovar, Hamdi Ramadani, tregoi për Front Online se cilat mosha duhet të marrin dozën e tretë të vaksinës,
“Në një grup të caktuar të qytetarëve të personave nuk po arrihet imuniteti i kënaqshëm mbi 70% dhe është kjo kategori e qytetarëve që kanë moshë të shtyrë, pastaj stafi shëndetësorë duhet të vaksinohen, banorët e shtëpisë së pleqve, janë persona që duhet të bëhet edhe vaksina përforcuese”, ka thënë ai.
Infektologu Ramadani: Qeveria të jetë e kujdesshme në lirim të masave
Ramadani ka porositur qeverinë që të jenë të kujdesshëm në lehtësimin e masave dhe të përcillet vazhdimisht gjendja në teren para se të ndërmerret vendimi për lirim të masave.
“Duhet të jemi shumë të kujdesshëm në kuptimin që të relaksohemi shpejt e që të hapemi shpejtë pasi që nuk kemi qytetarë të mjaftueshëm të mbrojtur me vaksinë”, ka thënë Ramadani.
Në total numri i rasteve aktive në vend është 1095 raste.
Kurse në tërë Shërbimin Spitalor Klinik Universitar të Kosovës, trajtim mjekësor po marrin 114 pacientë, prej tyre 58 me oksigjeno-terapi./Front Online/