Të martën që lamë pas janë identifikuar kufomat e shtatë personave nga Klina, të zhdukur gjatë luftës së fundit në Kosovë.

Kryetari i Komisionit Qeveritar për Personat e Pagjetur, Andin Hoti ka deklaruar për ”Front Online” se janë identifikuar 7 viktima të një nga masakrat më të mëdha të kryera nga forcat serbe në Kralan të Gjakovës.

Ai tregoi kur dhe si janë gjetur këto mbetje mortore.

“Personat tashme të identifikuar, për të cilët janë njoftuar familjaret dje, janë nga një nga masakrat më të rënda të kryera nga forcat serbe, të Kralanit. Mbetjet mortore (eshtrat) e gjetura për këto viktima, janë gjetur gjate procesit të gërmimeve qe kemi bere në Bishtazhin, ne Tetor 2023”, tha Hoti.

Hoti thotë se mbetjet mortore janë identifikuar përmes metodës së ADN-së dhe procesit të identifikimit nga Instituti i Mjekësisë Ligjore.

Ai gjithashtu theksoi se janë në proces të identifikimit edhe 5 viktima të tjera

“Pas procesit te identifikimit përmes metodës së ADN dhe identifikimit final nga Instituti i Mjekësisë Ligjore, ne kemi identifikuar 7 persona qe janë në listën e personave të zhdukur, si dhe 5 persona tjerë janë në finalizim të procesit të identifikimit për të cilët së pari do të njoftohen familjaret, theksoi Hoti.

Hoti shprehet se gërmimet gjatë këtyre muajve të këtij viti kanë qenë në disa lokacione.

“Lokacione tjera kemi në vazhdimësi, edhe këtë vit e kemi filluar me disa lokacione si Podujeva, Makoc, Dragodan, Malisheve, etj. të gjitha këto të trajtuara gjatë muajve të parë 2025”, shprehet ai.

Hoti thotë se deri tani, në vitin 2025 është gjetur vetëm një gjetje mortore në Obranqe të Podujevës, derisa procesi i identifikimit të mbetjeve mortore të vitit 2024 vazhdon.

“Gjetje mortore tjera për 2025 ka qene vetëm 1, në Obranqe, Podujeve. Ndërkaq gjetjet tjera qe kemi pasur ne 2024, janë ne proces te identifikimit”, deklaroi Hoti.