I tërë Komiteti Ekzekutiv i Komitetit Ndërkombëtar të Lojërave Mesdhetare (ICMG), të kryesuar nga presidenti, Davide Tizzano dhe sekretari i përgjithshëm, Iakovos Filippoussis, prej sot deri më 10 dhjetor 2022, do të qëndrojnë në Prishtinë.

ICMG për herë të parë ia ka besuar Komitetit Olimpik të Kosovës organizimin e mbledhjes së Komitetit Ekzekutiv, përcjell FrontOnline.

Krahas kësaj, KOK të premten organizon darkën zyrtare me ICMG, e cila mbahet edhe për nderë të 8-vjetorit të anëtarësimit të Komitetit Olimpik të Kosovës në Komitetin Olimpik Ndërkombëtar.

Pjesë e darkës zyrtare, përveç Bordit Ekzekutiv të KOK-ut dhe ICMG, do të jenë edhe Komitetet Olimpike të Kroacisë, Maqedonisë së Veriut dhe Malit të Zi.

Gjatë tri ditëve të qëndrimit në Prishtinë, ICMG do të kenë takime me drejtuesit e shtetit. Sot (14:00) do të priten nga ministri për Kulturë, Rini dhe Sport, Hajrullah Çeku, ndërsa nesër (16:20) do të kenë pritje nga presidentja e Republikës së Kosovës, Vjosa Osmani./FrontOnline/