Drejtori i Asociacionit të Komunave të Kosovës, Sazan Ibrahimi, vlerësoi vendimin e Ministrisë së Financave për të shtyrë zbatimin e normës tatimore progresive për pronat komerciale si një rezultat të presionit nga Komunat.

‘’ Ky ishte rezultat i presionit të komunave, pra i Asosacionit të Komunave të Kosovës, ku ne ia hapëm sytë qeverisë ë Republikës së Kosovës e çka do të mund të ndodhë vitin e ardhshëm me tatimin në pronë’’, tha Ibrahimi për FrontOnline.

Ai theksoi se ky  vendim parandalon një rritje të madhe të tatimit në pronë, e cila do të kishte pasoja të rënda për pronarët dhe qytetarët.

‘’ Do të ishte një ngritje enorme e tatimit në pronë po të ndodhte ajo se çfarë është planifikuar me ligj dhe do të ndikonte keq për bizneset e qytetarët’’, tha Ibrahimi.

Ibrahimi shprehu shpresën se Qeveria do të reflektojë dhe do të ndryshojë ligjin, duke marrë parasysh ngarkesën që tashmë po përballojnë qytetarët me tatimin në pronë dhe faturat që kanë pranuar këtë vit.

‘’ Po shpresojmë që niveli qendror duhet të reflektojë dhe të ndryshoj këtë ligj sepse edhe qytetarët janë të mbi ngarkuar me tatimin në pronë me fatura të cilat  i kanë pranuar këtë vit’’, përfundoi Ibrahimi.

Tërheqja e Muratit/ Ligji për Tatimin në Pronë do t’i dëmtonte bizneset dhe konsumatorët, të ndryshohet plotësisht