Ish-ministri i Jashtëm i Kosovës, Enver Hoxhaj, e ka nisur Ditën e Pavarësisë me një vizitë në Prekazin heroik, duke kujtuar sakrificën e familjes Jashari dhe të gjithë atyre që dhanë jetën për lirinë e Kosovës.
Në një postim në rrjetet sociale, Hoxhaj shkruan: “Ditën e pavarësisë 🇽🇰 e nisëm në Prekazin heroik, simbolin e rezistencës e sakrificës për liri. Askush nuk mund ta zhbëjë sakrificën e popullit të Kosovës. Askush nuk mund ta rishkruajë historinë e lavdishme të popullit tonë. Lavdi përjetë!”
Prekazi mbetet një nga simbolet më të forta të rezistencës së popullit shqiptar ndaj regjimit serb, ku sakrifica e familjes Jashari frymëzoi luftën për liri dhe pavarësi.
Dita e Pavarësisë së Kosovës shënohet çdo vit më 17 shkurt, për të kujtuar shpalljen historike të pavarësisë në vitin 2008 dhe për të nderuar gjithë ata që sakrifikuan për një Kosovë të lirë e të pavarur.
