Vetëm në tentimin e shtatë, Ligji për Rimëkëmbje Ekonomike arriti të marrë votat e duhura për të kaluar në lexim të parë.

Por, kryeministri Avdullah Hoti është i bindur se ky koalicion qeverisës i ka votat për të kaluar çfarëdo ligji.

Madje, ai në Rubikon të Klan Kosovës ka thënë publikisht se në momentin kur koalicioni që ai udhëheq nuk e ka shumicën parlamentare, atëherë ai nuk do të jetë më kryeministër.

“Koalicioni qeverisës i ka votat për t’i kaluar të gjitha ligjet, siç e dëshmuam edhe tash. Në atë moment që nuk e kemi shumicën, unë nuk jam më kryeministër. Kjo qeveri e ka shumicën parlamentare dhe në atë momenti që nuk e ka shkon”.

Shefi i qeverisë i ka arsyetuar tentimet e njëpasnjëshme për të arritur shumicën e thjeshtë prej 61 votash për këtë ligj me mungesën e deputetëve në Kuvend për shkak të infektimit të disa prej tyre me COVID-19.

“Me muaj të tërë i kemi pasë 10-12 deputetë, të pozitës dhe opozitës, që kanë munguar vazhdimisht në Kuvend. Me muaj të tërë nuk i kemi pasë në sallë 64 deputetë, siç i patëm tash. Për disa muaj, rreth pesë ose gjashtë deputetë kanë qenë në izolim për shkak të infektimit me COVID-19. Kjo ka qenë arsyeja kryesore, derisa në herën e fundit njëri nga deputetët ka qenë në udhëtim dy-tre javor për çështje familjare”.

“Në disa prej seancave që janë mbajtur në Kuvend, koalicioni qeverisës nuk i ka pasë krejt deputetët në Kuvend – i ka pasë diku 57 ose 58 deputetë, sepse njëri nga deputetët shërohej e tjetri infektohej me COVID-19”.