Deputeti i AAK-së, Daut Haradinaj thotë se nuk mund të hyhet në Kosovë duke kaluar mbi varrezat masive e eshtrat e shqiptarëve të masakruar.

Kjo duke iu referuar kërkesës së presidentit serb, Vuçiq për tu futur në Kosovë dhe reagimit të BE për refuzimin e kësaj kërkese.

Haradinaj thotë se nuk pret dhembshuri nga krahët politik e ushtarak të kohës së Millosheviqit.

Si hap të vetëm për sigurimin e një normalizimi dhe lëvizje të lirë e sheh pranimin e fajit për krime e gjenocid, kërkim faljen, rikthimin e eshtrave dhe dorëzimin e kriminelëve para drejtësisë.

Ky është postimi i tij i plotë:

Nuk hyhet në Kosovë duke kaluar mbi varrezat masive e eshtrat e shqiptarëve të masakruar.

Ne nuk presim të ndiejnë dhembshuri krahët politik e ushtarak të kohës së Millosheviqit, ata që projektuan vrasjet, masakrat, gjenocidin në Kosovë e sot udhëheqin me shtetin që kreu krimin, por presim pranim e kërkimfalje për gjenocidin e ushtruar ndaj shqiptarëve .

Pranimi i fajit për krimet e gjenocidin, kërkimfalja, rikthimi i eshtrave i të të gjithë shqiptarëve të zhdukur në varrezat masive si dhe dorëzimi i kriminelëve serbë para drejtësisë, janë hapi i vetëm dhe i duhur që do të mund të siguronte një normalizim dhe lëvizje të lirë.

Andaj veprimi i Ministres së Jashtme, Meliza Haradinaj-Stublla, për ndalimin e vizitës së Vuçiq dhe të tjerëve në Republikën e Kosovës është i drejtë dhe ne e përkrahim fuqishëm.

Kosova nuk do të lejojë shantazhet, provokimet dhe lojërat politike të atyre që ndihen krenarë për krimet e gjenocidin ndaj shqiptarëve. Kjo nuk është rruga drejt normalizimit dhe paqes afatgjate.