Kryetarja e Gjykatës Speciale, Ekaterina Trendafilova e ka caktuar një trup gjykues të Gjykatës së Apelit në kuadër të këtij tribunali, për ta shqyrtuar një ankesë të nënkryetarit të Organizatës së Veteranëve të Luftës së UÇK-së, Nasim Haradinaj.

Trupi gjykues i përbërë nga tre gjykatës do ta shqyrtojë ankesën e Haradinajt, i cili e apeloi vendimin e gjykatësit Nicolas Guillou për t’ia vazhduar atij paraburgimin, raporton Gazeta Express.

Michèle Picard, Kai Ambos dhe Nina Jørgensen janë gjykatësit që do ta shqyrtojnë dhe do të vendosin lidhur me ankesën e Nasim Haradinajt.

Haradinaj u arrestua në Prishtinë më 25 shtator të vitit të kaluar në bazë të një urdhërarresti të lëshuar nga gjykatësi një ditë më parë, dhe u transferuar në paraburgimin e Gjykatës Speciale në Hagë më 26 dhjetor.

Më 24 dhjetor të vitit që shkoi, gjykatësi i procedurës paraprake, Nicolas Guillou urdhëroi vazhdimin e mbajtjes së Haradinajt në paraburgim dhe e refuzoi kërkesën e tij për ta mbajtur një seancë për këtë çështje.

Të martën, Haradinaj e apeloi këtë vendim në Gjykatën e Apelit që funksionon në kuadër të Gjykatës Speciale.