Guvernatori i Donetskut u ka bërë thirrje 350,000 civilëve që të evakuohen nga ai rajon lindor i Ukrainës për shkak të një ofensive të afërt ruse.
Thirrja erdhi një ditë pasi presidenti rus Vladimir Putin shpalli fitoren në rajonin fqinj Luhansk, i cili ra plotësisht në duart e Rusisë këtë javë. Besohet se Donetsk është objektivi i radhës i rusëve, prandaj autoritetet u kanë bërë thirrje civilëve që të evakuohen.
“Fati i Ukrainës do të vendoset në Donetsk”
Guvernatori i Donetskut, Pavlo Kirilenko, tha se evakuimi i 350,000 civilëve ishte “i nevojshëm për të shpëtuar jetë” dhe për “të mundësuar ushtrinë ukrainase të mbrojë qytetet më lehtë kundër ofensivës ruse”.
“Fati i të gjithë vendit do të vendoset në Donetsk. Kur civilët të evakuohen nga rajoni, ushtria do të jetë në gjendje të përqendrohet te armiku,” tha Kirilenko.
Dje, forcat ruse bombarduan rëndë Slovyansk, një qytet në Donetsk, i cili, së bashku me Kramatorsk, besohet të jetë një objektiv kryesor për forcat ruse. Kryetari i komunës së Slovjanskës, Vadim Lika, në Facebook u bëri thirrje banorëve që të evakuohen./FrontOnline/