“Saktësisht nuk mund të dihen datat se kur përfundimisht do të votohet për anëtarësimin e Kosovës në Këshillin e Evropës”.
Kështu ka thënë deputeti i Lëvizjes Vetëvendosje Gazmend Gjyshinca, në Klan Kosova.
I njëjti, ka thënë se procedurat e anëtarësimit dallojnë nga shteti në shtet.
Por, sipas tij, e mira qëndron në faktin se nga 47 shtetet anëtare, Kosovën e kanë njohur shumica, ndërsa me vendet tjera ka një ofanzivë të mirë, edhe me ndihmën e shteteve mike të Kosovës.
Për anëtarësim në KiE, nevojiten 2/3 e votave të Asamblesë së këtij institucioni.
Anëtari i Komisionit për Politikë të Jashtme, ka folur edhe për vizitën e Kryeministrit Albin Kurti në SHBA, sipas të cilit, i njëjti ka transformuar rrënjësisht raportin e Kosovës me SHBA, në të mirë të marrëdhënieve bilaterale.
Kurse, për formimin e “Qeverisjes së Mirë” të PDK-së, Gjyshinca, ka thënë se të tilla formate janë të njohura nëpër vende demokratike, dhe si veprim respektohet, pasi demokracitë duhet të kenë edhe një opozitë konstruktive.