[wp-story]

Lajme

​Përurohet pika e UÇK-së së Jezercit në parkun memorial të UÇK-së në Ferizaj

​Përurohet pika e UÇK-së së Jezercit në parkun memorial të UÇK-së në Ferizaj
11:06 | 28 Shtator 2020

Përurohet pika e UÇK-së së Jezercit në parkun memorial të UÇK-së në Ferizaj

Në Komunën e Ferizajt sot është shënuar Dita e Dëshmorëve të UÇK-së, ku në nderim të kësaj dite është bërë përurimi i pikës 6 të UÇK-së në Jezerc në kuadër të parkut memorial të UÇK-së.

Me këtë rast kryetari i Komunës së Ferizajt, Agim Aliu, tha se në këtë dite po nderohen të gjithë ata që dhanë jetën për lirinë e Kosovës.

Sa i përket Parkut Memorial të UÇK-së në Jezerc, Aliu tha se do të shërbejë që gjeneratat e reja të mos e harrojnë të kaluarën e UÇK-së.

Aliu: Përulemi dhe ndjejmë respekt për dëshmorët dhe heronjët

 

“Secili nga qytetarët sot e ndjenë vogëlsinë e tij para veprës madhore të ushtarëve të UÇK-së, e në mënyrë të veçantë ndaj dëshmorëve dhe heronjve të kombit. Pra, është kjo sot dita ku ne me emocion por edhe me përulje kujtojmë veprën heroike të dëshmorëve e të heronjëve tanë. Ne jemi një komb i vogël por që vazhdueshëm në të gjitha etapat dhe proceset historike kemi dhënë dhe kemi pasur bij dhe bija të cilët i kanë dal zot vendit të tyre. Por, pa dyshim se dalzotësit më të mëdhënjë kanë qenë ata që janë rreshtuar në tri shkronjat e arta të UÇK-së dhe sigurisht në këto tri shkronja të arta të UÇK-së kanë dhënë jetën shumë heronjë dhe dëshmorë që jo vetëm sot këtu në Jezerc po gjithandej territorit të Republikës së Kosovës përulemi dhe e ndjejmë respektin ndaj tyre”, tha ai.

I pari i Ferizajt tha se edhe pas 22 vitesh asgjë nuk e ka zbehur dhe nuk do ta zbehë luftën heroike të UÇK-së.

Aliu: Asgjë nuk e ka zbehur dhe nuk do ta zbehë luftën heroike të UÇK-së

 

“Tashmë kanë kaluar 22 vite, por asgjë nuk e ka zbehur dhe nuk do ta zbehë luftën heroike të UÇK-së. Përkundrazi çdo ditë çdo javë çdo muaj, e çdo vit i kaluar vetëm sa e ka madhështuar dhe do e madhështojë edhe më shumë jo vetëm veprën heroike të dëshmorëve e te heronjëve, por edhe luftën e bashkëqytetarëve tanë të cilët sot shyqyr Zotit i kemi në mesin tonë. Kjo që po e bëjmë ne sot këtu me inaugurimin e pikës 6 flet më së miri për përkushtimin e institucionit në këtë rast të Komunës së Ferizajt që krahas përjetësisë dhe lavdisë së heronjëve dhe dëshmorëve ne kemi bërë një projekt që është unik në gjithë Kosovën, është një trashëgimi për gjeneratat që vijnë”, tha ai.

Ndërsa, Luan Jahiri nga OVL e UÇK-së, tha se në Parkun Memorial të UÇK-së në Jezerc po shënohet historia e luftës së UÇK-së.

Jahiri: Jemi krenarë që respektohen meritat që kemi

 

“Është ajo që pas 22 vitesh po shënjezojmë një vend, një monument që është pjesë e parkut memorial të UÇK-së në Ferizaj…Ne si Organizatë e Veteranëve të Luftës jemi krenarë në përgjithësi që respektohen meritat që i kemi”, tha ai.

Përurimin e pikës 6 të UÇK-së në Jezerc në kuadër të Parkut Memorial të UÇK-së e quan ngjarje të jashtëzakonshme Daut Ilazi, zëvendëskomandant në Zonën Operative të Nerodimes.

Ilazi: 22 vjet më parë këtu është zhvilluar një ndër betejat më të rëndësishme të UÇK-së

 

“Sot 22 vjet më parë këtu është zhvilluar një ndër betejat më të rëndësishme të UÇK-së. Jemi tek pika 6 e UÇK-së në Zonën e Nerodimes, këtu janë zhvilluar luftime që nga 20 shtatori deri me 28 shtator, me 28 ka qenë kulminacioni i ofensivës serbe, ku në këtë betejë kanë rënë dëshmorë të UÇK-së të cilët me gjakun e tyre janë bërë themel i lirisë të cilën po e gëzojmë sot. Ky përvjetor është në një mënyrë më i rëndësishëm po shoh që Komuna e Ferizajt ka investuar në rregullimin e pozicioneve të UÇK-së, me rregullimin e parkut për dëshmorët dhe lavdia iu takon dëshmorëve…Unë kam pasur fatin të jem në mesin e bashkëluftëtarëve të mijë këtu në pikën 6 edhe unë kam qenë i plagosur”, tha ai.

Në Ditën e Dëshmorëve të UÇK-së në Ferizaj janë bërë edhe homazhe tek varrezat e Dëshmorëve ne Ferizaj si dhe është mbajtur maratona e vrapimit 42 km – organizuar nga OVL – UÇK dega Ferizaj – pjesëmarrës veteranët dhe ushtarët e FSK-së.

Petrol Company në muajin e shenjtë të Ramazanit, dhuron pako ushqimore per familjet nevojtare në qytetin e Vitisë

Të tjera