Pas kundërshtive të kryeministrit Avdullah Hoti me nënkryetaren e Kuvendit Arbërie Nagavci për çështjen e të pagjeturve, shefi i Grupit Parlamentar të LDK-së, Arben Gashi, tha s’duhet të ketë përçarje pozitë-opozitë me këtë çështje të ndjeshme dhe se duhet unitet për të arritur sukses ndaj Serbisë.
Nagavci akuzoi Hotin se ka nënshkruar një paragraf në Marrëveshjen e Washingtonit ku barazon të pagjeturit me të zhvendosurit duke thënë se kjo është e turpshme. Ndërsa, këtë fjalim kryeministri Hoti e cilësoi si më të ligun që ka dëgjuar ndonjëherë në Kuvend.
Por, Gashi insistoi që për të pagjeturit fajtor është vetëm shteti i Serbisë që në mënyrë të organizuar varrosi shqiptarët, duke përmendur edhe zbulimin e fundit të varrezës masive me trupa të shqiptarëve në Rashkë të Serbisë.
“Personat e pagjetur dhe fati i tyre, dhimbja e shoqërisë kosovare të përdoret për interesa politike me argumente të paqena është turp i madh. Personat e pagjetur po trajtohen këtu nga një këndvështrim i gabuar. Për personat e pagjetur ka vetëm një fajtor, jo dy – shteti i Serbisë. Jo regjimi i Millosheviqit, jo politika e Serbisë, po shteti i Serbisë. Ato vrasje, ato zhdukje janë kryer nga shteti i Serbisë, nga strukturat shtetërore – pa marrë parasysh kush ka qeverisur. Ata kanë dokumente”.
“S’kemi nevojë që të kapemi mes vete për këtë çështje, sepse fajtor është Serbia dhe mos ta drejtojmë gishtin nga njëri-tjetri. Duhet të jemi unik dhe të kërkojmë partneritet ndërkombëtar, sepse ky mund të jetë çelësi që ne të zbardhin fatin e personave të pagjetur, që ata të kenë një varr. Duhet të krijojmë presion mbi Serbinë sepse s’ka vullnet në Serbi që çështja e personave të pagjetur dhe krimet e luftës të zbardhen”.
“Abuzimi i juaj këtu më duket i pandershëm, i pandershëm për familjet që kanë vuajtur sot, për shtetin e Kosovës që mundohet me gjetë zgjidhje por përballë ka një shtet që ka mendësi kriminale edhe në këtë çështje. Kjo është edhe e pandershme për partnerët ndërkombëtarë që angazhohen”.
“Kërkoj të jemi unik në këtë çështje delikate, të jemi të vendosur për t’i dhënë institucioneve të Kosovës të gjithë mekanizmat e nevojshme dhe përkrahjen e nevojshme politike dhe sociale për të arritur që të bëjë presion për zbardhjen e kësaj çështje”.
