Një furgon i Postës së Serbisë nuk është lejuar sot të futet në Kosovë.

Kjo u konfirmua për Klankosova.tv nga zëvendësdrejtori i policisë për veriun Veton Elshani.

Elshani tha se ndalesa është bërë për shkak se nuk ka pasur licencë.

“Njësiti kufitar e kanë pyetur shoferin për licencë dhe pyetje të tjera dhe i njëjti është kthyer prapa”, tha ai për Klankosova.tv

Elshani njoftoi se rasti ka ndodhur në pikën kufitare në Jarinje.

Ditën e djeshme policia i ka mbyllur nëntë objekte të Postës së Serbisë, në katër komunat veriore.

Aksioni është realizuar duke u bazuar në informacionet e ARKEP-it (Autoritetit Rregullativ të Komunikimeve Elektronike dhe Postare), se kjo postë nuk posedonte licencë të operimit.

Aksione të tilla në veri janë zhvilluar edhe për disa pompa të derivateve dhe Bankës Postare të Kursimeve, që kishte shpërndarë kundërligjshëm pagat dhe pensionet në dinarë.

Kjo për shkak që sipas rregullores së re të BQK-së, që hyri në fuqi më 1 shkurt e njeh si valutë të vetme të pagesave EURON.