Mbrëmjen e së dielës, dy vetura në Pejë janë përfshirë nga zjarri. Zjarrvënia po dyshohet të jetë e qëllimshme, ndërkaq veturat i përkasin një avokati.
Dy veturat e avokatit Mustafë Kastrati nga Peja, janë përfshirë nga zjarri mbrëmjen e së dielës.
Zjarrvënia po dyshohet të jetë e qëllimshme, por avokati ka deklaruar për Express se deri më tani nuk ka dyshime se kush mund ta ketë shkaktuar zjarrin.
“Dyshohet se është e qëllimshme, por Policia është duke i hetuar rastet. Janë përfshi, por e kemi fikur zjarrin. S’kam kurrfarë dyshimi në askënd. Lëndime nuk ka pasur, vetëm dëme materiale”, ka deklaruar Kastrati.
Ndërkohë, Prokuroria Themelore e Pejës tashmë ka nisur hetimet lidhur me rastin.
Këtë e ka konfirmuar zëdhënësi i kësaj Prokurorie, Shkodran Nikçi.
“Për ketë rast në koordinim me Policinë e Kosovës jemi në fazën e identifikimit të personit apo personave të dyshuar për zjarrvënien e dy veturave. Lidhur me këtë çështje nuk mund të japim me shumë informata në ketë fazë”, ka deklaruar Nikçi.
Ndërkaq, nga Policia e Pejës kanë deklaruar se rasti ka ndodhur në rrugën “Mulla Agani” në Pejë.
“Më 24.01.2021, Policia ka pranuar informatën se në rrugën “Mulla Agani” janë duke u djegur dy vetura. Pronari ka arritur ta lokalizojë zjarrin, ndërkaq në vendin e ngjarjes kanë shkuar njësitet relevante policore dhe zjarrfikësit. Rasti është duke u hetuar”, ka deklaruar zëdhënësi i Policisë së Pejës, Driton Rugova.
