Trajneri i Përfaqësues U20 të Kosovës në volejboll, konkurrenca e meshkujve, Blendi Haxhikadrija ka mbyllur me sukses të lart kursin ndërkombëtarë për trajnerë “International Coaching Course”, i cili u mbajt në Budapest të Hungarisë, përcjell FrontOnline.
Komiteti Olimpik i Kosovës, falë projektit të fituar në Solidaritetin Olimpik të Komitetit Olimpik Ndërkombëtar, mbuloi shpenzimet e trajnerit.
“Jam shumë i lumtur me këtë arritje. Kjo është hera e parë që një trajner volejbolli mori pjesë në një kurs të tillë. Shpresoj që kjo të jetë vetëm nismë dhe shumë tjerë ta përcjellin, pasi që Kosova ka nevojë për avancimin e trajnerëve”, ka thënë Haxhikadrija për uebfaqen zyrtare të Federatës së Volejbollit të Kosovës.
“Falënderoj KOK-un dhe Federatën e Volejbollit të Kosovës, të cilët më mundësuan këtë përvojë të jashtëzakonshme”, shtoi ai.
Përgjatë këtyre trajnimeve, të cilat zgjatën për 10 javë, u përfshinë lëndë të ndryshme si pedagogjia, teoria e trajnimit, përgatitja kondicionale, fiziologjia, menaxhimi i sportit etj.
Në këtë kurs morën pjesë shtatë trajnerë nga vende të ndryshme të botës, të cilët iu nënshtruan më shumë se 100 orëve përgatitje teorike dhe 200 orëve përgatitje praktike ne specializimin e sportit specifik./FrontOnline/