Bota/Rajoni

“Drejtësia vonon, por nuk harron”: Ish-presidenti i Sudanit gjykohet për puçin e para 31 vjetëve

“Drejtësia vonon, por nuk harron”: Ish-presidenti i Sudanit gjykohet për puçin e para 31 vjetëve
16:08 | 21 Korrik 2020

Ish-presidenti i Sudanit, i cili është rrëzuar nga pushteti përmes protestave, Omar al-Bashir, ka dalë në gjyq në kryeqytetin Khartoum në lidhje me puçin ushtarak përmes të cilit kishte ardhur në pushtet para më shumë se tri dekadave.

Burri 76-vjeçar, që tashmë është dënuar për korrupsion, mund të dënohet me vdekje, nëse shpallet fajtor për rolin e tij në puçin e vitit 1989, shkruan “BBC”, transmeton Express.

Bashkë me të, në këtë proces gjyqësor po gjykohen edhe 20 ish-zyrtarë. Bashir u rrëzua nga pushteti vitin e kaluar pas protestave masive dhe të vazhdueshme.

Kryengritja civile kishte nisur në fund të vitit 2018, fillimisht si shprehje e pakënaqësisë për ngritjen e çmimit të bukës, por shpejt u shndërrua në thirrje për t’i dhënë fund pushtetit të gjatë të Bashirit.

Më 11 prill 2019, ushtria kishte njoftuar se ish-presidenti është rrëzuar nga pushteti dhe është arrestuar.

Në gusht të atij viti ishte formuar një qeveri kalimtare, e përbërë nga zyrtarë të lartë ushtarakë dhe figura civile.

Bashir është person i kërkuar edhe nga Gjykata Ndërkombëtare e Krimeve për shkak të dyshimeve për krime lufte dhe gjenocid në rajonin e Darfurit.

Më 30 qershor të vitit 1989, Bashir kishte ardhur në pushtet përmes puçit ushtarak kundër qeverisë së zgjedhur në mënyrë demokratike, që për kryeministër e kishte politikanin Sadiq al-Mahdi.

Kush ështe kosovari THE VICTOR që synon tregun e jashtëm? (video)

Të tjera