Aleanca për Ardhmërinë e Kosovës sot ka mbetur edhe pa një nënkryetare të saj.
Kjo për shkak që nënkryetarja Magbule Shkodra, ka dhënë dorëheqje nga të gjitha pozitat në këtë parti.
Por, dorëheqje të shumta në këtë parti janë duke ndodhur kohëve të fundit. Madje, ata që po tërhiqen janë figura të larta të partisë, shkruan FrontOnline.
E, gjatë ditës së djeshme pas 21 vjetësh angazhim në këtë parti, ka thënë dorëheqje edhe Rexhep Kadriu, ish-kandidat për deputetë në Kuvendin e Kosovës dhe ish-zëvendës ministër i Infrastrukturës.
Ai, ka thënë se arsyeja e dorëheqjes është krejtësisht personale.
“Arsyeja e largimit tim është krejtësisht personale dhe tani e tutje kohën time do t’ua kushtojë familjes sime”, ka shkruar ai.
Nga kjo parti dorëheqje kohë më parë kanë dhënë edhe ish-kryetari i Komunës së Deçanit, Rasim Selmanaj dhe kryetari i Obiliqit, Xhafer Gashi.
Selmanaj, me të marrë këtë vendim ka deklaruara se tashmë do të jetë vetëm anëtar i kësaj partie duke mos ushtruar asnjë funksion tjetër.
Por, ndryshe ka deklaruar kryetari i Obliqit, Xhafer Gashi.
Gashi, ka thënë se arsyeja e dorëheqjes ka të bëjë me pakënaqësi rreth punësimit në këtë komunë.
“Pakënaqësia është lidhur me punësimin e qytetarëve pas zhvendosjes nga Koorporata Energjetike e Kosovës të banorëve të Hades dhe Shipitullës”, kishte deklaruar Gashi.
E, për gjithë këto dorëheqje për FrontOnline flasin nga Aleanca për Ardhmërinë e Kosovës, duke i arsyetuar ato.
Nënkryetarja e partisë, Time Kadrijaj në një prononcim për FrontOnline, thotë se në këtë parti nuk është duke ndodhur asgjë dhe se dorëheqjet po bëhen për arsye personale.
“Nuk është duke ndodhë asgjë në AAK, dorëheqja e fundit është dorëheqje me mirëkuptim , angazhime private, personale dhe e bëjnë publike, nuk është duke ndodhur asgjë. Aleanca është e fuqishme , po punon në terren, ka disa komuna që po i udhëheq, jemi të angazhuar për zgjedhjet lokale dhe kjo është vazhdimësi dhe qasje që ne të angazhohemi për zgjedhje lokale, jemi, duke i ristrukturuar dhe këto lëvizje bëhen për arsye personale, nuk ka ndonjë gjë të madhe që po ndodhë në Aleancë”, ka thënë Kadrijaj, për FrontOnline.
Sipas saj, nuk ka aspak pakënaqësi brenda kësaj partie dhe se njerëzit po tërhiqen për shkak të obligimeve personale e familjare.
E, pyetur se ndryshe ka deklaruar kryetari Xhafer Gashi, për dorëheqjen e tij, Kadrijaj ka pohuar se në çdo parti ndodhin lëvizje të tilla, pa dashur të flasë më shumë për akuzat e Gashit për AAK-në.
“Gjithkund ndodhin këto lëvizje, edhe kryetari i Obiliqit e ka pas të arsyeshme që ta formojë një iniciativë, e ka formu, është e drejtë qytetarë, është e drejtë e secilit qytetarë të rrinë, të vendoset, këto janë lëvizje që janë individuale, por nuk është diçka që po ndodhë në Aleancë”, ka deklaruar ajo për FrontOnline.
Ndryshe, Aleanca për Ardhmërinë e Kosovë në zgjedhjet e fundit parlamentare ka fituar vetëm tetë ulëse në Kuvendin e Kosovës./FrontOnline