[wp-story]

Front TV

Dita ushtarake e një kadeti, misioni deri në vetëflijim për atdheun

Dita ushtarake e një kadeti, misioni deri në vetëflijim për atdheun
19:29 | 03 Janar 2021

5 ditët e javës i kalon këtu.

Kazerma “Adem Jashari” në Prishtinë, për kadetin Aldi Blyta, është bërë shtëpi e dytë.

Aktivitetet ushtarake po se po. Por, edhe vaktet e bukës, ligjëratat, gjumin e thuajse gjithçka tjetër i bën brenda kësaj hapësire ushtarake.
Më konkretisht në Akademi.

Regjimi që ndjek ky dhe të tjerët prej të hënës në të premten është goxha i vështirë.

“Aktivitetet fillojnë me zgjimin në orën 4 e 50, ku edhe nisemi për në sallën sportive ku i kemi edhe ushtrimet e mëngjesit. Pas ushtrimit të mëngjesit vijon higjiena personale. E në 6 e 50 e kemi formacionin ku thirret nga kadet kapiteni, edhe e kemi inspektimin e dukjes personale të secilit kadet. Pas inspektimit bëhet ngritja e flamurit në orën 07:00 dhe nisja për në kuzhinë ku e kemi mëngjesin”, tregon ai.
Atë, ashti si të tjerët, çdo ditë i presin aktivitetet e ndryshme.
Madje, kanë edhe orë mësimi obligative.
“Pas mëngjesit janë orët e ligjëratave, varësisht prej gjeneratave. Kemi ligjëratat në akademi dhe ligjërata në Universitetin Amerikan. Varet prej aktiviteteve gjatë ditës, në ora 19:00 të mbrëmjes mbarojnë të gjitha aktivitetet pas darkës dhe fillon mësimi i obliguar për të gjithë kadetët prej orës 19:00 deri në 21:30. Të gjitha aktivitetet përfundojnë në orën 22:00 të mbrëmjes kur është fjetja”, tregon ai për Front Online.

Kadetët që kryejnë më sukses këto detyra gjatë javës si shpërblim marrin dy ditë pushim në vikend.
Të tjerët që nuk ia dalin, jo.

Një praktikë e tillë e shpërblim – ndëshkimit zbatohet gjatë 4 vjetëve sa edhe zgjatë krejt Akademia Ushtarake.

“Të premten në orën 16:00, në bazë të meritave ka disa kadetë që lejohen me shku në shtëpi dhe ka tjerë që dënohen dhe duhet të qëndrojnë këtu. Ata që dënohen, dënohen për arsye që dikush nuk e ka uniformën në rregull gjatë javës ose nuk ka diçka në rregull për arsye disiplinore ose diçka tjetër”, rrëfeu kadeti Blyta për Front Online.

Ndëshkimet, kadeti Blyta, thotë se nuk e demotivojnë.

Kurajën për të ecur tutje e për t`u mos u dorëzuar thotë se e gjen te figura e komandantit legjendar Adem Jashari dhe tek e gjithë bashkëluftëtarëve të tjerë që dhanë jetën për liri.

I gatshëm të flijohet për vatan është edhe vetë.

“Është e vërtetë, kemi plotë kadetë që janë djem të dëshmorëve, që kanë shërbyer në Luftën Çlirimtare të Kosovës”.
Gazetari: A jeni i gatshëm edhe ju me dhënë jetën?
“Normalisht edhe për atë arsye jemi këtu”.
Në qershor të 2021-s, Aldi pret të diplomojë e të kurorëzohet me gradën e nëntogerit.

Meqë vetë i kanë mbetur edhe pak muaj deri tek ky sukses, ky ka një mesazh për ata që duan t`i hyjnë rrugëtimit të tij.

“Me iu bashkëngjit trupës së kadetëve, edhe me u bë shembull. Me bart uniformën është nderi më i madh. I inkurajoj të gjithë me apliku”, e mbyll mesazhin e tij.

Akademia Ushtarake, e njohur me emrin, Qendra e Studimeve Universitare i posedon të gjitha kushtet e nevojshme që i duhen një kadeti gjatë periudhës së studimeve dhe trajnimeve.

 

 

Benzinë vetëm 1.05 euro në Petrol Company e shumë zbritje tjera në “Be Happy Restorant” dhe Market

Të tjera