Më shumë se 40 veta janë lënduar si pasojë e një shpërthimi të një bombole gazi në një restaurant në Ferizaj, ku 14 prej tyre janë dërguar për trajtim në QKUK.

Disa nga të lënduarit janë në gjendje të rëndë shëndetësore, ku shkalla e djegies shkon deri në 50%. Rastet e tilla nuk mund të trajtohen në vend pasi që Kosova nuk ka Qendër të Djegieve.

Burime të Front Online brenda Ministrisë së Shëndetësisë thonë se 3 pacientë që kanë marrë lëndime më të rënda pritet të dërgohen për trajtim në Turqi.

Edhe drejtori i Klinikës së Kirurgjisë Plastike, Zejnë Buja, gjatë një deklarate për media bashkë me u.d të presidentes, Vjosa Osmani, u ka bërë apel drejtuesve të institucioneve të Kosovës që ta shqyrtojnë mundësinë e ndërtimit të një Qendre të Djegieve, të cilën sipas tij, vetëm Kosova nuk e posedon, ku mund të trajtohen rastet e rënda të djegieve dhe mos të shpenzohen para jashtë vendit.

Një shpërthim i tillë i një bombole të gazit ka ndodhur javën e kaluar edhe në Prishtinë, ku janë lënduar 15 veta, të cilët poashtu janë trajtuar në Klinikën e Kirurgjisë Plastike. /Front Online/