Nuk dihet nëse ishte e planifikuar apo rastësi.

Takimi i parë premierë mes kryeministrit kosovar, Albin Kurti dhe presidentit serb, Aleksandër Vuçiq, në Bruksel u zhvillua në të njëjtën kohë kur në kryeqendrën diplomatike evropiane po qëndronte për vizitë presidenti më i fuqishëm në botë, Joe Biden.

Ky i fundit do të informohej nga kryeshefi i diplomacisë evropiane, Josep Borell për zhvillimet në Ballkanin Perëndimor, përfshirë vijueshmërinë e procesit të dialogut Kosovë-Serbi.

Andaj, nga Komisioni për Punë të Jashtme në Kuvendin e Kosovës, thonë se shefi i ekzekutivit kosovar në tavolinën me delegacionin serb do të duhej ta shtronte pos një temë.

“Meqenëse Biden ka qenë në Bruksel kryefjalë e takimit u dashtë me qenë pos njohja reciproke. Në mënyrë që të njëjtën temë ta dëgjojë edhe zoti Biden”, u shpreh Time Kadriaj për “Front Online”.

Sipas Time Kadrijes, që është pjesë e këtij komisioni, 4 propozimet e tjera ishin krejt të panevojshme.

“Është e pakuptimtë që ka hap tema të shumta në procesin e dialogut. Është dashtë veç njohja e Kosovës dhe asnjë temë tjetër, njohja me kufijtë e 17 shkurtit, e jo Asociacion me kompetenca ekzekutive. Kurti duhet t’ju kërkojë falje të gjithë atyre njerëzve që i ka qitë në rrugë, që besa që janë vra për kauza të tij që paskan qenë kauza veç për me ardhë në pushtet”, deklaroi ajo për “Front Online”.

Takimi i 15 qershorit, nga shoqëria civile, thonë se nuk qartësoi rrjedhën e dialogut.

“Ende është e paqartë edhe pas takimit të 15 qershorit se si do të ecim përpara. Është e qartë që nuk ka një dakordim. Duhet të dimë se si do të ecim përpara, çfarë temash do të diskutohen, çfarë do të ndodhë me marrëveshjet e arritura”, u shpreh Jeta Krasniqi nga KDI.

Megjithë përplasjet, Kurti e Vuçiq, u pajtuan që takimin e ardhshëm ta mbajnë më 25 korrik./Front Online