Kërkesa për votimin e Projektligjit për Trustin po vazhdon nga opozita dhe qytetarët.
Dy partitë opozitare, AAK dhe PDK në mbledhjen e kryesisë së Kuvendit që u mbajt të hënën, kanë bërë thirrje që të sillet ky Projektligj sa më parë për votim në Kuvend.
Ata i kanë bërë thirrje edhe deputetëve të mazhorancës që ta votojnë këtë Projektligj dhe në këtë mënyrë të ndihmohen qytetarët, duke marrë një pjesë të kursimeve të Trustit.
Por, ky Projektligj as këtë javë nuk do t’i dërgohet për shqyrtim Komisionit për Buxhet, Punë dhe Transfere.
Anëtari i këtij komisioni nga LVV-ja, Visar Korenica, për FrontOnline, tha se nuk e kanë ende të konfirmuar se kur ky projektligj do t’i dërgohet komisionit për shqyrtim.
“Këtë javë nuk kemi komision, kemi takim pune me zyrën kombëtare të Auditimit, ta shohim agjendën për javën e ardhshme e pranojmë të premten, por momentalisht nuk e kemi të konfirmuar se në cilin prej javëve do ta kemi të konfirmuar”, tha ai për Front Online.
Ndryshimi i Projektligjit për Trustin i cili iu mundëson qytetarëve tërheqjen e 30 % të kursimeve pensionale është iniciuar nga deputeti i PDK-së, Bekim Haxhiu./Front Online/