Minatorët e minierës së “Trepçës” në Stantërg kanë ndërprerë punën në këtë minierë për shkak të mos marrjes së pagave muajin e kaluar.

Ata kanë thënë se greva do të vazhdon deri të zgjidhet ky problem.

E lidhur me gjendjen e krijuar në Trepçë, për Front Online, ka folur deputeti i PDK-së, Ferat Shala.

Ai tha se fajtorë për gjendjen e krijuar në këtë ndërmarrje është Qeveria e Kosovës dhe Ministria e Ekonomisë dhe Ambientit, pasi që siç tha ai, nuk kanë bërë asgjë për këtë ndërmarrje.

Shala i cili është edhe anëtar i Komisionit për Ekonomi, Punësim, Industri-Tregti, tha se Trepça është në prag të familemimit.

“Përgjegjëse është Qeveria e Kosovës, ministria përkatëse që menaxhon me sektorin e cila ka disa muaj që Trepçën e ka lanë pa institucione menaxhuese, pa bord menaxhues, pa drejtor e zyrtar menaxhues me ushtrues detyre, asnjë plan pune e zhvillimi në esencë. Trepça është lënë nën mëshirën e fatit të vetë pa struktura menaxhuese e udhëheqëse  duke e lënë në një situate të keqmenaxhimit të skajshëm dhe rezultati është ky që ajo është në prag të falimentimit ose praktikisht e falimentuar”, tha ai për Front Online.

Sipas tij, Qeveria e Kosovës e udhëhequr nga Avdullah Hoti, ka dështuar në fushën e sektorit ekonomik përkatësisht në sektorin e industrisë.

“Qeveria deri tani nuk ka bërë asgjë dhe nuk pres që do të mund ta zgjedh këtë problem, po shihet që s’ka asnjë qëllim zhvillimor. Qeveria do të duhet ta kishte në funksion edhe ligjin për rimëkëmbje që nuk e ka në esencë ka dështuar në të gjitha fushat e sektorit ekonomik e veçanërisht në sektorin e industrisë”, u shpreh ai për Front Online.

Front Online ka provuar të marrë një përgjigje edhe nga Ministri Blerim Kuçi dhe zëvendësministrat e Ministrisë së Ekonomisë, por ata nuk janë përgjigjur./Front Online/