Deputeti i Lidhjes Demokratike të Kosovës, Ardian Shala i ka bërë thirrje ish-nënkryetares së LDK-së, Vjosa Osmani që të vazhdojë bashkëpunimin me Lidhjen Demokratike të Kosovës, raporton Front Online.
Kjo, pasi që Osmani pas shkarkimit nga pozita e nënkryetares dhe anëtarës së kryesisë së LDK-së ka deklaruar se do të formojë parti të re dhe se më nuk do të jetë pjesë e këtij subjekti politik.
“Nga këtu unë i bëj ftesë Vjosa Osmanit që të bashkëpunojë me LDK-në pa marrë parasysh që i ka disa mospajtime me liderin e partisë, por nëse i ka me liderin nuk do të thotë që i ka me komplet strukturat sepse ne mbajmë një respekt për të dhe kem dëshirë që ajo të jetë pjesë e LDK-së”, ka thënë Shala, për Front Online.
Deputeti Shala, i cili është edhe kryetar i Degës së LDK-së në Suharekë, ka thënë se Osmani është aset i LDK-së.
“Vjosa llogaritet aset i LDK-së, është rrit dhe është ndërtuar në LDK, aset i LDK-së, edhe unë atë gjithherë e llogaris LDK pa marrë parasysh ajo që nganjëherë ka marrë veprim të tillë, kurrsesi nuk e llogaris të ndame prej LDK-së”, është shprehur ai.
Por, pavarësisht qëndrimit të tij për Osmanin, Shala thotë se do të vazhdojë të qëndrojë në LDK dhe të punojë për këtë parti, dhe se asesi nuk do t’i bashkohet iniciativës së saj.
“Unë asnjëherë nuk kam thënë që do të braktis LDK-në sepse vazhdimisht kam qenë dhe kam punuar për LDK-në, do të punojë për LDK-në sepse e di që është alternativë më e mirë për qytetarin pa marrë parasysh baticat dhe zbaticat nganjëherë që mund t’i ketë secili subjekt, besimin e kam te LDK-ja, që përmes LDK-së me rregullu Kosovën”, ka deklaruar deputeti Shala për Front Online.
I pyetur rreth kandidatit për kryeministër, Shala ka pohuar se ende nuk kanë ndonjë qëndrim.
“Besoj se së shpejti edhe ata do të dalin me një qëndrim. Për neve secilin që e kandidojnë do ta respektojmë dhe do të punojmë sepse e dimë që punojmë për një alternativë e cila më shumë se 30 vjet ka punuar veç për shtet”, ka thënë ndër të tjera ai.
Deputeti Shala ka votuar kundër rrëzimit të Qeverisë “Kurti”, pasi që ka deklaruar se koalicioni në mes Vetëvendosjes dhe Lidhjes Demokratike të Kosovës, ka qenë koalicion i shpresës për qytetarët e Kosovës./FrontOnline/