Fushata për zgjedhjet e jashtëzakonshme në vend do të filloj më 2 shkurt 2021 dhe do të zgjasë 10 ditë, deri më 12 shkurt, raporton Front Online.
Por jo rrallëherë partitë kanë shkelur rregullat për fushatë dhe janë dënuar nga Paneli Zgjedhorë për Ankesa dhe Parashtresa (PZAP) me gjoba.
Mulë Desku nga PZAP-ja për Front Online ka thënë se gjoba më e lartë që mund t’u shqiptohet është deri në 50 mijë euro.
“Ne bazë të Ligjit për Zgjedhjet e Përgjithshme – LZP nenit 120. Paragrafi 1 pika c) PZAP-i mund të vendosë një gjobë ndaj një subjekti politik në vlerë deri në pesëdhjetëmijë (50,000) Euro. Shqiptimi i gjobave nga PZAP-i parashihet edhe me Rregullën Nr. 01/2012, Për Kategorizimin e Sanksioneve dhe Gjobave të PZAP-it, nenit 5 paragrafi 2”, ka thënë Desku për Front Online.
“Neni 33 i LZP-së parasheh se cilat veprime janë te ndaluara gjatë bërjes së fushatës zgjedhore nga ana a e subjekteve politike, mbështetësve ose kandidatëve te subjekteve politike”, ka thënë Desku.
Por partitë e edhe vet kandidatët për deputet kanë filluar tanimë daljet në terren, por që me Ligjin për Zgjedhjet e Përgjithshme nuk parashihet sanksionim se a kanë të drejtë apo jo të bëjnë fushatë.
“PZAP-i ka mandat te shqiptoj gjoba vetëm gjatë fushatës zgjedhore. Fushata parazgjedhore nuk sanksionohet me Ligjin për Zgjedhjet e Përgjithshme – LZP”, është shprehur Desku për Front Online.
Në zgjedhjet e mbajtura të 6 tetorit 2019 subjektet politike garuese në zgjedhje janë gjobitur nga Paneli Zgjedhor për Ankesa dhe Parashtresa (PZAP) me rreth 360 mijë euro për shkelje të ndryshme brenda këtij procesi.
Në zgjedhjet e kaluara ndër shkeljet më të shpeshta që kanë ndodhur kanë qenë, përdorimi i fëmijëve në fushatë, vendosja e posterëve në hapësira publike, vendosja e posterëve në objektet private, vendosja e tavolinave në vendet e ndryshme me posterë të ndryshëm. Pra, këto kanë qenë shkeljet më të shpeshta në zgjedhjet e kaluara./Front Online/