Nënkryetarja e Partisë Demokratike të Kosovës (PDK), Vlora Çitaku, i ka bërë thirrje kryeministrit të vendit, Albin Kurti që të udhëtojë në Shtetet e Bashkuara të Amerikës (SHBA) për t’u takuar me zyrtarët amerikanë.

Çitaku ka thënë se pala kosovare duhet ta ketë parasysh që bashkëbiseduesi kryesor nuk është Beogradi, por Brukseli e Washingtoni.

“Unë e di që ky proces nuk është si Big Brother. E di që ky proces kërkon pak diskrecion. Kryeministri këtu e ka mirëkuptimin tonë. Pala kosovare duhet ta ketë të qartë se bashkëbisedues parësor nuk e kemi Beogradin, por e kemi Brukselin dhe Uashingtonin. Kurti urgjentisht duhet të udhëtoj në Uashington dhe të takohet me zyrtaret e lartë të administratës Biden”, ka thënë ajo.

Tutje, Çitaku ka thënë se dialogu nuk do të ketë sukses pa përfshirjen direkte të SHBA-ve, duke shtuarse raportet ekonomike e tregtare do të jenë pengëi mosmarrëveshjes politike.

“Raportet ekonomike tregtare, shkëmbimet kulturore arsimore do të jenë pengë i mosmarrëveshjeve politike. Besoj se duhet të përqendrohemi aty. Koha nuk punon për ne, andaj ne duhet qe të kërkojmë përfshirjen e drejtpërdrejtë të ShBA-së. Mua më vije mirë që në javën tjetër në vizitë do të jenë Eskobar e Lajcak”.

Çitaku këto komente i bëri një një diskutim të organizuar nga D4D.